陳茂波稱赤字在所難免 議員死撐香港並非「金融中心遺址」
陳茂波稱赤字在所難免 議員死撐香港並非「金融中心遺址」

《財政預算案》嘅公眾諮詢已正式開始,財政司司長陳茂波向立法會財經事務委員會總結整體經濟狀況,今年經濟同資產市場表現較預期差,政府地價及印花稅收入下跌,預計今年赤字超過1,000億元,較2月估算嘅544億為多。佢又表示香港明年面對嘅挑戰較大,稍後《預算案》會交代下年度會否再錄得赤字,但佢形容該情況可能「在所難免」。

      

陳茂波今午出席財經事務委員會會議,佢表示過千億赤字估計相對於GDP只有3至4%,加上政府借貸比率低,強調將來有新項目引入投資者,或透過發債等「組合拳」方式處理融資,財政儲備完全有能力應付未來。佢又透露,目標係今個月內完成並公開新投資移民計劃細節,入場門檻3,000萬港,政府初步打算將部分資本,「引導去支持創科產業發展」,目前正研究可行性。佢形容現時政府思路係「用時間畀解決問題嘅空間」,並指將赤字控制喺3%至4%,則不會對整體公共財政造成任何憂慮。

         

陳茂波強調財政儲備有足夠實力確保財政穩定,議員們亦唱好香港前景,保險界陳健波指新加坡獲西方國家支持,不應用作同香港比較,佢又批評好多「香港人鍾意唱衰自己,好奇怪」;民建聯黃俊碩駁斥「金融中心遺址」一說,稱香港近來係唔少金融會議東道主,「唔係遺址,係種下下種子」。不過佢補充,內地網民有此錯誤印象認為香港「最輝煌時間已過去」,可能同港股市場低迷有關。

        

陳茂波喺立法會財經事務委員會會議上指,香港樓市持續疲弱,地緣政治環境複雜同高息環境,拖累經濟同投資氣氛,打擊政府地價同印花稅收入。佢表示,政府必須善用公帑,「鞏固經濟復蘇動力,同時投資未來,擴大經濟發展容量,強化自身經濟,發掘新經濟增長點,支持本港經濟進一步發展,相信經濟好,稅收自然好。」 為減少支出,佢指喺2024至25年度同25至26年度,分別扣減各政策局同部門嘅經常性資源1%,以重新分配予新推行政策措施。

        

陳茂波表示佢公開邀請內地網民「多啲嚟香港睇吓,玩吓」,便知香港國際大都會特色。佢承認今年股票市場表現的確疲弱,恒指由年初至上月底累計跌約14%,日均成交量由去年嘅1,250億元,降至今年約1,056億元。佢指出香港有一半上市公司嚟自內地,其交投量佔整體高達七成至八成,港股表現同內地經濟有關。陳茂波承認港股市場流動性比以往低,已正視問題並設立專責小組,推出措施吸引更多國際企業嚟港上市同資金。

            

事實上,香港吸引力下降,早前恒指被台灣加權指數超越。恒生指數連續第2個交易日下跌,開市高開後回落,尾市跌逾200點,低見16617點;收市跌184點,報16646點,成交量縮減至約1060億元。同時,台灣加權指數續升,收市報17421點,與恒指差距擴大

發佈時間: 2023年12月04日 23:32
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.