英媒:中國現854萬「老賴」 無力還款列黑名單 佔勞動人口1%疫情以來新高 反映中國經濟下滑
英媒:中國現854萬「老賴」 無力還款列黑名單 佔勞動人口1%疫情以來新高 反映中國經濟下滑

疫後以來中國經濟未見明顯反彈,除左內房泡沫、青年失業率高等,外媒更發現,中國欠債人數達800萬以上,畀當局限制佢哋嘅經濟活動。而呢批「老賴」更達動勞人口1%,認為間接反映中國經濟下滑。

   

英國《金融時報》昨日(3日)報道,喺2020年疫情爆發初期,因為唔能夠償還欠款而被列入失信黑名單嘅人數只有570萬人,但到今時今日升至854萬人。呢854萬人當中,大部分介於18歲至59歲之間,佔中國勞動人口嘅1%,佢哋嘅欠款由房貸到生意貸款都有。

   

報道指出,中國當局列人黑名單人數嘅增加,顯示出中國經濟嘅下滑,成為經濟復甦嘅絆腳石。喺現時中國嘅法規下,被列入黑名單嘅欠款者會被限制經濟活動,例如唔可以買機票、唔可以用微信支付購物等,分析認為會進一步拖累中國已經陷入低迷嘅經濟。

   

報道引述恆生銀行(中國)首席經濟學家王丹(Dan Wang)表示,違約者急劇增加唔單只係週期性問題,仲係結構性問題。

中國出現個人債務危機係因為過去十年嘅借款熱潮。北京智庫國家金融同發展實驗室今年9月嘅數據顯示,過去10年中國家庭債務占GDP增加達64%。當人民嘅收入受影響或者大環境經濟唔好嗰陣,就會逐漸出現還款困難嘅問題,最終無力還債而違約。

   

報道訪問咗一名喺江西開廣告公司嘅張女士,佢因為拖欠銀行債務而被列入黑名單。佢話,因為地方政府唔可以同被列入黑名單嘅公司合作,所以佢失去咗客源,最後決定執咗間公司。

   

但佢而家又擔心畀法院禁止使用微信支付帳號購物。佢話,今年5月被法院禁止使用微信支付帳號之後,連為個細仔買嘢食都唔得。佢話:「我擔心我兒子會餓死,因為我手上無任何現金,所有日常開支都透過微信帳戶來支付。」

   

佢曾經向法院申請解除凍結微信支付帳號,只喺其他方面懲罰佢冇償還欠款,但並唔成功。佢話,法院話如果佢能夠還清償務,生活就可以返返正常,「但當我面對諸多限制,我可以怎樣賺錢?」

   

所謂的「老賴條款」,根據《最高人民法院關於公布失信被執行人名單信息的若干規定》,失信被執行人(老賴)會被凍結手機支付交易同購物,仲會限制出入境;另外仲會限制高消費,唔可 搭飛機、高鐵,只能搭乘速度較慢嘅動車;又唔可以擔任企業的高管同法定代表人,最高監禁可達7年。

發佈時間: 2023年12月04日 17:11
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.