周庭接受日媒訪問稱患PTSD 考慮申請政治庇護 曾被迫返大陸、感謝警方信 湯家驊:保釋條件警方可自由釐定
周庭接受日媒訪問稱患PTSD 考慮申請政治庇護 曾被迫返大陸、感謝警方信 湯家驊:保釋條件警方可自由釐定

前香港眾志副秘書長周庭,尋晚(3日)喺Instagram公佈,已經喺9月離開香港,前往加拿大讀書,並就其國安案件宣佈棄保不再回港。周庭今日接受日媒訪問,表示考慮申請庇護,並透露身體出現問題,包括PTSD(創傷後遺症)。至於之前佢發文指被迫返大陸同寫悔過書、感警方信,資深大律師湯家驊表示,保釋條件警方可自由釐定。

   

周庭今朝(4日)接受咗日本東京電視台(テレ東BIZ)嘅視像訪問。佢用日語表示「我永遠無法返香港」。周庭今年12月原本要國安案件返香港報到,但日前喺IG發文表示決定唔會再返香港。

   
報道提到,周庭而家正考慮佢嘅未來計劃,考護申請庇護。佢話自己喺香港呢三年咩都做唔到,又指身體出現問題包括有PTSD。對於佢未來會唔會喺海外參與推動香港民主運動,周庭未有直接回應,只表在海外還是想持續找尋可以做的事情,讓海外的大家都能關心香港。   

   

周庭嘅IG帖文交代咗過去兩年半嘅經歷。喺帖文中,佢聲稱曾被警方國安處人員安排去咗內地參觀,先獲准去加拿大升學。而且返到香港後,佢被要求寫咗封信,內容係感謝警方安排,令佢能夠了解祖國嘅偉大發展。

   

對於警方嘅安排,網上感到嘩然。行政會議成員兼資深大律師湯家驊指出,保釋條件理論上可以由警方釐定,再同嫌疑人協定,所以唔需要額外授權。湯家驊講,任何保釋個案,嫌疑人要申請保釋或者暫時離港,都係由警方同受查人雙方同意相關條件。湯家驊又指,若雙方對條件細節有分歧,可以交由法庭決定。

   

對於周庭表示,要跟國安返大陸參觀同寫感謝信,以換取獲發還旅遊証件,湯家驊就未聽過:「我未聽過,可能因為我孤陋寡聞。」他表示經協商改變保釋條件,理論上只要雙方同意便可以:「視乎雙方要求啲咩嘢囉,呢個我又唔係覺得,佢係被要求做一啲犯法嘅嘢。」

   

過去有反對派人士喺保釋期間離開香港,但之後表示唔再返港。湯家驊認為,警方每次批出保釋或者考慮交還旅遊證件時,都要考慮好多因素,包括犯人潛逃風險、所涉罪行嚴重性、批准保釋是否對檢控或舉證有利等。佢認為近年曾參與政治活動嘅人物離港之後,潛逃嘅機會率相對較高,警方喺未來處理相關案件時,可能會多考慮呢一點。

發佈時間: 2023年12月04日 15:06
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.