特權「血槽姐」引內地網民熱議! 上海女子西藏車禍 阿里全體公務員獻血、包機飛四川治療 傳親屬為國家中醫藥管理局局長
特權「血槽姐」引內地網民熱議! 上海女子西藏車禍 阿里全體公務員獻血、包機飛四川治療 傳親屬為國家中醫藥管理局局長

一名上海女子喺西藏阿里發生車禍,佢嘅親戚透過關係聯絡到西藏阿里地區,當地公務人員為佢捐血嘅事件,成為微博熱門話題。網民稱佢為「血槽女」質疑有特權。雖然家屬試圖澄清網民嘅質疑,但就越描越黑。

   

據內媒報道,自稱小余嘅女子拍話喺西藏自駕遊時出咗車禍,肝臟破裂、失血嚴重,有生命危險。並指親戚「小姑姑」透過關係得到上海市衛健委同阿里地區協助,而且阿里當地更發動「所有公務人員」包括派出所警員、消防員、部隊官兵為佢捐血,最終用 7,000 多毫升血,佢先至喺鬼門關度返嚟。及後,佢又搭 G550 醫療「包機」轉運到四川接受救治,喺傷勢穩定後又由四川返上海繼續治療。

   

有網友質疑「小姑姑」到底係咩人,可令上海市衛健委調動援藏醫療專家,仲能夠發動阿里地區所有公務人員為佢捐血,係咪有利用特權嘅嫌疑。

   

據事主丈夫陶先生透過傳媒解釋,話「小姑姑」唔係上海公務人員,只係太太車禍之後建議向當地相關部門上海衛健委求助,平時關係密切嘅小姑姑先想到辦法聯繫到上海衛健委。而上海衛健委則表示,當時佢哋係接到咗「相關部門」嘅函件,請求正喺西藏日喀則市嘅援藏醫生,前往當事醫院參與救治,表示並無因私人關係而行動。

   

可以見到,呢個小姑姑確實能夠聯繫到上海衛健委,仲能夠令「相關部門」發件畀衛健委。對於一般人嚟講,最多都只係打個衛健委嘅熱線電話,所以令人生疑。而且亦有網友爆料指,嗰位姑姑名為余艷紅,係中國國家中醫藥管理局局長。

   

另外網民在意嘅係最關心嘅,仲有冇發動「全體公務人員」為佢捐血。陶先生指佢嘅講法只係為咗鼓勵太太嘅求生意志,又指實際上係醫院嘅工作人員喺朋友圈發訊息,希望有好心人去獻血,而佢自己就聯絡咗當地派出所、消防等部門。

   

阿里地方政府工作人員則表示,確實有幹部職工為受傷女子捐血,但唔係官方組織嘅,而係見到相關消息之後自願去捐血。嗰名工作人員又話,由於阿里地區醫療條件較落後,血液庫存緊張,如果有人求助,好多幹部職工都會自願捐血。

   

呢件事喺微博變成熱門話題。「阿里全體公務員為一女子獻血」同「女子父親包機轉院」,都登上咗微博熱搜。

   

網民表示「沒關係的人會動用這麼多人力物力組織捐血嗎?」亦有人指「本來是個大傢伙獻愛心的好事,但這個女的發的內容,實在是讓人沒有感受到她對這些救命恩人的人感謝」「捐血沒多大事,有錢包機也沒啥問題,自己出的錢。但是她字裡行間要表達自己有錢有權利,這就出問題了」「她第一個反應說小姑姑牛逼,讓人覺得在炫耀家裡關係硬」。

   

雖然《環球時報》前總編輯胡錫進就指,當地幹部號召獻血,顯示出社會溫情同人情嘅一面,外界應看到這次人道主義救死扶傷事件嘅正面價值。不過,自由亞洲電台訪問了獨立評論員季風認為事件涉及官方嘅宣傳操作,佢話經過三年疫情,民眾對政府信任度下降。佢認為事件宣傳部門有參與其中,想帶風向想發放正能量,但佢指而家無論點講,老百姓已經將官員同公務員同貪官壞人劃上等號,對政府已經失去咗信任。


   

時事評論員方原表示,事件引發爭議後,涉事者同政府部門試圖澄清降溫,但更多唔合理嘅講法引起咗民間更多嘅質疑,呢個時候爆發,加深咗官民之間嘅矛盾。

發佈時間: 2023年12月01日 17:00
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.