緬甸北部果敢自治區係電信詐騙集團嘅老巢，緬北同盟軍近日宣佈清剿電詐，緬甸果敢加速移交犯人送中。截至目前為止，緬北已經向內地移交咗大約3.1萬個電信網絡詐騙犯罪嫌疑人。

根據公安部刑事偵查局嘅官方微博表示，呢3萬1千個電騙嫌犯入面，包括咗背後嘅「金主」、組織頭目同核心成員63名，以及網上在逃人員1531名。

公安部指出，目前為止，喺緬甸各方嘅大力配合下，累計移交咗3.1萬名電信網絡詐騙嫌疑人畀中方，並被涉案地嘅公安機關陸續押返。公安機關表示，將會徹查這些嫌疑人嘅全部違法犯罪事實，並會依法嚴懲。

另一方面，早前報道過緬甸北部四大家族之一，白所成家族同時係「蒼勝詐騙園區」創辦人白應蒼，佢嘅30歲生日party影片喺內地網絡上流傳。影片中出現咗多位中港明星嘅祝福片段，包括曾志偉、黃一飛、曹查理等人。對於參與呢段影片嘅明星，曾志偉回應話自己係應內地朋友嘅要求，幫朋友嘅朋友拍片祝賀生日，但經過呢次事件後，以後對於唔熟悉嘅人提出拍片要求，佢都會拒絕。

曹查理亦就參與影片一事作出回應，否認同詐騙集團有來往，佢解釋話係經經理人嘅游說下接受咗工作，自己唔知道影片嘅具體用途，佢話自己返嚟之後，為咗賺錢維生，所以接受咗呢份工作，希望大家原諒。

據有線新聞報道，喺內地明星收錢拍祝福片已經形成一個產業鏈。喺電商平台上，只要輸入「明星祝福」等搜尋字眼，就會發現有店家以內地及港澳台明星名人做招徠，聲稱可以安排佢哋拍攝祝福影片。

收費一般會根據名人明星嘅知名度同表演內容而定，最平嘅可能幾十至幾百蚊人民幣，而名氣大嘅明星，就可能要幾萬甚至十萬元以上。有內地傳媒指出，同一類型嘅名人影片，每月銷售量超過千份，網上店家通常會透過各級代理商去聯繫相關人士。

有線新聞引述律師劉志浩表示，錄製祝福影片本身唔係非法行為，但如果影片中提及企業品牌等內容，就可能變相成為廣告，應該納入廣告法規範疇。佢又話如果明知拍片對象涉及非法犯罪，例如牽涉電信詐騙行為，而且影片內容同犯罪行為有實質關聯，咁就有可能構成共同犯罪。