【戴定頭盔】 麥美娟:投票率不會追求一個數 社會穩定市民或不想投票 網民:零投票率是否等於社會完美?
【戴定頭盔】 麥美娟:投票率不會追求一個數 社會穩定市民或不想投票 網民:零投票率是否等於社會完美?

唔夠3個禮拜就係區議會選舉,黨媒今日先吹雞叫「各界籲積極投票 選出合心水區議員」,點知「嗰個女仔」民政及青年事務局局長麥美娟,佢接受報章訪問時表祘,對於投票率唔會「追求一個數字」,仲話社會穩定時市民未必想去投票,甚至連登記做選民都無。

   

麥美娟接受《星島日報》訪問,被問及區議會選舉,佢表示喺「完善」咗嘅區議會新選制下,形容市民嘅「聲音大大」,可以行使投票權同監察權,選舉前後都有話語權。麥美娟指履職監察指引將於年底、即新一屆區議員明年1月1日上任前公布,指引會設立「負面行為清單」,包括未經主席同意發言、插嘴、話題離題、重複,同埋會議上拍片直播等。如果勸喻或警告都冇糾正,違規議員將會畀政府處罰。

   

麥美娟進一步表示,過去因為政治立場對立,區議會選舉經常出現「鬥疊聲」、「遮海報」等行為,佢形容鬧交其實比較容易吸引眼球,但今屆區選選舉文化改變,候選人要做更多工夫,完善政綱吸引選民關注,競選工程更加艱難。

   

麥美娟提到政府會對區議員工作設定要求,包括開設辦公處,唔可以像過去「請個助理幫手拆信」咁樣。另外,佢話區議員要就多個關乎市民福祉嘅政策,包括《基本法》第23條立法等,去徵詢地區意見。

   

今屆區議會有179個委任議員,政府年底會公佈委任議員名單。被問到會唔會「兜底」委任部分落選者,麥美娟就指,委任原則係用人唯才、愛國者、熟悉地區需要。至於投票率,佢話唔會「追求一個數」,而係要市民明白投票嘅重要性。佢認為,社會相對穩定時,市民唔會想去投票。

   

佢又提到460名關愛隊成員因為參選區議會或做選舉代理人,要申請暫停職務,但佢話關愛隊跨區動員能力強,申請停職嘅關愛隊成員,只佔全體成員不足一成,認為唔會影響服務。

    

對於麥美娟嘅言論,有網民就表示:「根據她的說法,0投票率是否等於社會完美?」「咁就唔好日日叫人投啦」「弱智都可以,厚顏領十萬薪水,簡直當藍絲係韭菜」「講咩都得~ 你哋講曬」「係咯,既然咁穩定,取消埋個選舉制度好過啦,晒時間晒錢。」

發佈時間: 2023年11月20日 16:53
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.