習大大喺20大提出話要文化自信，官媒《中國知識產權報》更發文話，著漢服就係「文化自信」嘅一種表達。上有好者，下必有甚焉，內地掀起一股漢服熱，而家連學校都跟風。

據湖南《瀟湘晨報》報道，山東省臨沂市光耀實驗學校最近公佈咗一系列秋冬季嘅校服設計，當中有款秋季校服設計，呢款校服主色調係深藍色，配以淺藍色，有翻領同拉鍊計，不過拉鍊旁邊就設有深藍色嘅中式盤扣，膊頭部同右胸位置印有中式嘅祥雲圖案。

不過家長們對於呢款設計似乎就唔係咁buy，上網串爆話個設計「好像壽衣」，甚至有人問：「是哪個大師設計的？是哪個領導拍板定的？」似乎意有所指。

報導引述學校嘅員工表示，因為學校主推國學，想用漢服風格，學生背誦詩詞時可以唔使換衫。嗰位員工仲話新校服「非常漂亮」，並指學校之前已經徵求咗部分學生、家長同老師嘅意見，仲有男女學生試穿。佢指由於校服限價，所以學校改用新款式，一套價格大概係人民幣百零蚊，對於有家長聯想到壽衣，佢表示「部分家長聯想到壽衣。其實現在壽衣的款式也有中山裝、西裝、唐裝，難道這些衣服都不能穿了？」

雖然校方表示曾經徵詢過家長所以唔會更換，但係當地羅莊區教育和體育局喺15日表示，由於家長意見較大，該校已淘汰咗嗰款校服。又指將會敦促學校廣泛徵詢家長意見，尊重師生同家長建議，維護其權益。當局亦將嚴格做好校服訂製管理工作，防止類似事件發生。

對於嗰款校服，網民反應就柴台居多，甚至有人恥笑：「學校真是抓住了靈堂設計的精髓」。不過亦有人覺得唔似壽衣，指「有中式元素，但弄得很土」、「像不像壽衣不知道，但難看是真的，不倫不類」。仲有人表示「某寶一堆都比這好看」。另有人指不是漢服，「領子是西方的，釦子是明清的，顏色是近代的。告訴你是漢朝風格」，亦有人護航話「總有一些不吉利的人會聯想到不吉利的東西」，更指正指「壽衣釦子都是偶數」。

另一方面，漢服唔一定人人都識，9月時有女性著漢服到武漢盤龍城考古遺址公園聚會影相，竟被畀工作人員驅趕，因為誤以佢哋係「日本裝扮」，而當時正值日本排核廢水，反日情緒高漲。另外要留意嘅係，中國最近打算修改《治安管理處罰法》，新增條文，禁止在公共場所穿著、佩帶「傷害中華民族感情」嘅服飾，令部分網友擔憂執法者可能會有主觀判斷，引起不必要嘅問題。