新一輪以巴衝突逾一個月，以色列早前對加沙走廊（Gaza Strip）進行地面行動，日前包圍加沙最大嘅醫院，指控巴勒斯坦武裝組織哈馬斯（Hamas）利用醫院作為掩護，當中有佢哋嘅指揮中心同地道。日前以軍喺醫院發現哈馬斯嘅指揮中心以及武器。

根據路透社報道指出，希法醫院（Al-Shifa Hospital）已成為以色列軍隊入侵加沙市（Gaza City）嘅主要目標。以色列稱哈馬斯嘅核心總部就設喺希法醫院地底隧道中。

以色列軍方同時釋出一段影片，顯示喺醫院院區一棟未開放大樓內發現軍備，當中包括自動步槍、手榴彈、彈藥同防彈衣。以色列軍隊聲明提到，喺醫院一個房入面「找到屬於哈馬斯的行動指揮中心同技術資產，顯示這個恐怖組織將這間醫院用於恐怖主義目的。」

以色列一再強調希法醫院院區位於哈馬斯總部上方，美國亦都表示，呢個講法有其自家情報單位嘅支持。以色列總理內塔尼亞胡（Benjamin Netanyahu）讚許以色列軍隊攻進醫院並喺聲明中宣稱：「加沙沒有有我們到不了的地方。沒有藏身之處。」佢仲表示：「我們將到達並消滅哈馬斯，我們會把人質帶回來。」

以色列指，以色列軍隊15日喺希法醫院外擊斃武裝分子後進入院區。進入後冇同平民、病患或工作人員發生衝突。而路透社則引述醫院裡面嘅目擊者講話，以色列軍隊喺建築物入面移動時，氣氛緊張，有聽到零星槍聲，但未傳出有人受傷嘅消息。

針對以軍嘅講法，哈馬斯反控以方捏造證據，將武器擺喺醫院拍，話係擺明插贓嫁禍，指以色列企圖為破壞加沙醫療機構的種族滅絕罪行辯護，駁斥以色列聲明為「謊言同廉價宣傳」。

另外加沙衞生部門亦都否認以軍指控，話地下室係醫院嘅一部分，衝突爆發後改建為避難所，又指以軍喺附近發現嘅隧道，同醫院無關。

加沙地帶衛生部門負責人布爾什（Munir al-Boursh）發表聲明，否認以軍在希法醫院發現任何武器或裝備。佢強調「我們不允許」武器進入任何醫院。 

聯合國安全理事會呼籲將人道暫停緊急延長，畀人道主義援助得以進入加沙地區。安理會亦要求立即無條件釋放哈馬斯扣押嘅所有人質。不過以色列至今都拒絕停火，認為停火對哈馬斯有利。