《自由亞洲電台》報道，黎智英案周二（25日）進入第138日審訊，控方繼續圍繞《蘋果日報》過百篇被指煽動嘅文章盤問黎智英，當中包括論壇版作者一劍飄塵同資深評論員李怡嘅文章。面對控方連番質問，黎智英多次反駁，甚至帶點諷刺意味，質疑控方點解覺得佢會知道作者嘅真正想法，反問難道我同佢哋心靈相通？

控方展示由一劍飄塵撰寫嘅文章〈槍桿下何來安居樂業？〉，問黎智英係咪同作者持相同意見。黎回應指，當時冇咁諗過，亦強調即使認為文章寫得好，都唔代表佢同意作者所有觀點。控方進一步追問，問佢唔同意邊部分，黎就回應當時冇咁諗過。控方再問佢依家諗一諗可以嗎？黎拒絕作答。

控方隨後指出，黎智英知道該作者透過文章請求針對中港政府實施制裁或敵對行為，黎就堅稱自己唔知道，並強調讀過文章唔代表參與請求制裁，亦唔認為文章顯示作者有咁嘅主張。

控方繼續追問，指黎智英知悉該作者有意煽動仇恨中央政府同香港政府，黎即語帶諷刺咁回應，話呢啲係人哋寫嘅文章，我點會知道？太驚人啦！呢啲係人哋嘅說話，難道我同佢心靈相通？控方再問，指黎知悉該作者煽動香港市民非法改變香港依法制定事項，黎當場反諷，話我點會知？我真係諗唔通，麻煩你話俾我聽，你太聰明啦。

法官李素蘭即刻開口制止，話拜托黎先生，唔好再作呢啲評論，請唔好再自作聰明。另一法官李運騰亦開腔，話你可以回答不同意，但呢度有成百篇文章，如果你繼續咁樣，我哋出年仲喺度。黎最終回應話明白。

控方再展示一劍飄塵嘅另一篇文章〈美國會制裁林鄭月娥嗎？〉，其中提到香港作為國際三大金融中心之一，喺遭受中共同林鄭月娥之流邪惡摧殘嘅今日，如果被美國實施金融制裁，令邪惡受到懲罰，算唔算惡有惡報？控方問黎係咪認同呢個講法，黎回應話文章完全屬於作者意見，自己無權反駁，亦無特別去諗。

控方進一步質問，指黎一直主張制裁中港官員，黎即否認，強調唔係一直以嚟，並指喺國安法實施後，自己已經冇再請求制裁。

控方亦質疑《蘋果日報》作為平台發表呢啲文章，黎反問So what？強調《蘋果》有好多作者，自己唔可能逐篇去諗同唔同意文章內容，亦唔認為自己需要對每篇文章負責。

控方繼續展示時事評論員李怡嘅文章〈警惕左翼思潮〉，並引用其中一段提及拜登當選後對中國政策，話佢會一如既往要求中國遵守各項國際規則，但唔會好似特朗普咁，對違規者作出任何懲罰，亦唔會制裁侵犯人權、違反國際承諾嘅中港官員。

控方隨即指出，呢段文字反映李怡希望拜登對中國實施懲罰，制裁侵犯人權嘅中港官員。黎即刻反駁，話邊度有咁講？全篇文章都係負面語氣，佢（李怡）係話拜登唔會制裁。控方再指文章本質上係希望拜登制裁中港官員，黎就反問，邊度讀得出呢個本質？重申李怡文章清楚指出拜登唔會似特朗普咁實施制裁。

面對控方咬住文章不放，黎最後回應，話文章係話拜登唔會制裁，你點樣可以顛倒過嚟問我？《I》