今年初，中國AI語言模型「DeepSeek」強勢崛起，以免費開源、效能突出嘅特點，一度橫掃中國AI應用市場，被視為可以對抗ChatGPT嘅強勁對手。但短短幾個月內，DeepSeek卻迅速跌落神壇。DeepSeek嘅月均下載量由首季嘅8111萬暴跌至2258萬，跌幅高達72.2%

根據中國數據研究機構QuestMobile最新發佈嘅《2025年第二季度AI應用價值榜》，DeepSeek嘅月均下載量由首季嘅8111萬暴跌至2258萬，跌幅高達72.2%，市場關注度明顯消退。

喺2025年第一季，DeepSeek曾經同時奪得AI應用下載量同活躍用戶（MAU）嘅冠軍，風頭一時無兩。然而僅過數月，第二季嘅下載量已經被字節跳動旗下嘅AI助手「豆包」超越；活躍用戶亦由1.87億下跌至1.7億，跌幅達9.3%。QuestMobile數據進一步顯示，DeepSeek喺4月開始出現大量用戶流失，其中5月離開嘅用戶當中，59.2%轉投百度App、38.6%轉向豆包，另有7%轉投阿里旗下嘅「元寶」App。

QuestMobile分析指出，DeepSeek出現流量雪崩，除咗市場競爭激烈，產品本身亦有不少問題，例如伺服器不穩定、回應速度緩慢，專業領域回覆嘅準確度低，嚴重影響用戶體驗。此外，原定5月上線嘅R2版本至今仍未推出，令用戶普遍感到「更新寥寥、誠意不足」。

產品策略上，DeepSeek堅持免費開源路線，雖然有助推動中國AI技術嘅普及，但同時亦削弱咗其商業競爭力。與此同時，阿里、百度、字節跳動等大廠紛紛推出價格更低、效能更高嘅同類API產品，令DeepSeek過往「高性價比」嘅定位受到嚴重挑戰。

反觀競爭對手「豆包」嘅表現則非常亮眼。QuestMobile分析指，「豆包」能夠喺第二季登頂，主要係字節跳動充分利用自身平台流量導入，並且積極開拓教育領域等垂直應用場景，成功打造「高頻、剛需」嘅應用環境。

雖然奇虎360創辦人周鴻禕力挺DeepSeek創辦人梁文鋒「有夢想、志在AGI（通用人工智慧）」，但喺當前AI應用市場百家爭鳴嘅情況下，理想同現實嘅差距正考驗住DeepSeek嘅生存空間。

有內媒分析指出，DeepSeek嘅急速衰落唔單止係產品本身嘅問題，更反映出中國AI產業激烈嘅「內卷」現象。即使技術有所突破，但缺乏創新嘅應用場景同穩定嘅商業模式，依然難以長久生存。

與此同時，7月14日，中國召開中央城市工作會議，係近10年來首次。會後，中共黨媒《人民日報》罕有地刊登習近平直接批評地方政府「一窩蜂」上馬新能源同人工智能項目嘅言論。習近平直言質疑：「上項目，一說就是幾樣：人工智能、算力、新能源汽車，是不是全國各省份都要往這些方向去發展產業？」彭博社報道指，習近平如此直接同口語化嘅批評非常少見，因為官方媒體通常只會發佈更正式嘅講話或者政策指引。

習近平嘅批評正值中國正積極推動「反內卷」運動。3月政府工作報告明確提出整治「內卷式」競爭；6月修訂嘅《中華人民共和國反不正當競爭法》亦已出台；而7月中央財經委員會更明確提出「反內卷」，治理無序競爭，推動落後產能退出。

英國廣播公司（BBC）分析指，習近平嘅直言質疑，一方面暴露咗中國地方政府喺新興產業佈局上存在嚴重嘅同質化問題；另一方面亦顯示出中國「大政府、大市場」嘅體制，喺推動經濟增長嘅同時，亦埋下咗產能過剩嘅隱患。