2018年憑藉清裝劇《延禧攻略》爆紅嘅吳謹言，今日（13日）無預警喺微博宣布已經領證結婚，對象係同劇演員洪堯。其實，吳謹言同洪堯早喺之前已經傳出過緋聞，仲被拍到過疑似同居嘅畫面，但因為洪堯過去有出軌紀錄，加上不斷有負面傳聞，所以外界對呢段感情一直唔睇好。當時連編劇于正都出面否認呢段緋聞。

講起洪堯，其實佢喺2013年參加相親節目《非常完美》時已經吸引唔少注意。當時24歲嘅洪堯喺節目中表現得高大靚仔，贏得女嘉賓嘅芳心，最終同一位叫曹贏心嘅女仔牽手成功，當時兩人嘅甜蜜互動仲感動咗唔少觀眾。大家以為只係節目效果，點知節目完咗之後佢哋真係拍拖，仲經常喺社交平台晒恩愛。洪堯仲講過，雖然有好多人唔睇好佢哋，但佢話會堅持走下去：「我就是這麼固執，比如戀愛，就談一場不分手的。」

節目中，洪堯仲精心策劃咗一場假結婚儀式，佈置咗一個驚喜場景，佢仲當場承諾五年之後會舉辦一個屬於佢哋真正嘅婚禮。當時，好多觀眾都覺得洪堯係個好男人，認為佢哋一定會行到終老。但可惜，呢段感情喺2015年就告終，因為洪堯被爆出軌，對象係一位年僅16歲嘅整容網紅李蒽熙，佢當時喺網絡上爆紅，身材惹火，仲流出咗佢哋嘅親密合照，令洪堯形象盡毀，網民紛紛怒斥佢係「渣男」、「噁心」，負面評價不斷。

今日，吳謹言喺微博上宣布佢同洪堯結婚嘅消息，震撼不少人。于正亦喺微博發文送上祝賀，寫道：「良辰吉日，雙喜臨門，大吉大利，見者隨喜。」呢句話仲引起網友嘅好奇，有人問于正提到嘅「雙喜」係咪指吳謹言懷孕。于正就趕緊解釋：「陸虎也結婚，好朋友和藝人的婚禮在同一天，對我而言不就是雙喜？」佢仲強調話，吳謹言同洪堯係經歷咗七年考驗，最終修成正果：「鞋穿的合不合適只有腳知道。」

早喺2019年，吳謹言同洪堯已經傳出緋聞。當時洪堯喺自己嘅微博上貼咗兩人嘅親密合照，但好快又刪除，呢個舉動令唔少網民覺得奇怪，紛紛猜測佢哋係咪喺拍拖。但後來呢件事就冇咗下文。直到2020年，佢哋被網民目擊到一齊去三亞旅行，當時兩人私下互動非常密切，但佢哋仍然冇對外作出任何回應。

去到去年，有傳聞指佢哋已經喺橫店同居，因為有媒體拍到吳謹言凌晨收工落車時，佢助理似乎用手指向隔離洪堯嘅停車位，然後洪堯深夜聚餐完之後就開車返去地下車庫，與吳謹言一齊進入同一單位。不過，由於冇佢哋同框嘅畫面，只係進入咗同一棟樓，所以好多網民都覺得呢件事未必可信。

而依家，隨住吳謹言正式宣布結婚，過去嘅謠言都變成咗事實，唔少網民都表示驚訝，亦有人對呢段感情表示祝福。《I》