前港區人大常委譚耀宗今早（16日）喺電台節目中表示，本港有啲企業表面上係出於商業考慮，但實際上可能會對國家造成不利影響，​佢強調「唔好做，要更小心」。​佢又提到，​有關巴拿馬運河經營權嘅交易，​佢認為係「錢銀問題啫」，​民族大義更加重要，​「唔覺得錢銀好重要」。​

譚耀宗提到，​夏寶龍主任喺「全民國家安全教育日」致辭時，​強調香港人素有愛國愛港嘅優良傳統，​特別係近代以來，​同祖國心連心手牽手，例如抗美援朝，​霍英東向祖國運送戰略物資。​譚耀宗認為，​夏寶龍係利用霍英東呢個「正面例子」嚟鼓勵港商，​因為喺韓戰期間，中國極缺物資，​霍英東為國家解困，「呢種精神好值得學習」，​如果商人幫助國家，會得到後世及國家稱讚傳頌。​

佢又指出，​夏寶龍希望工商界以港為家，​繼續喺香港投資，​貢獻國家，​希望企業家「可以頂得住」，​喺困難時期更加能夠表現出民族堅定性。​譚耀宗認為，​現時只係暫時困難，​相比起韓戰時，中國軍隊被迫出兵，​裝備單薄但仍然可以應付，​將敵方「迫返三八線，打贏韓戰」，​更何況中國現時已經係世界強國，​更加唔需要擔心。​

夏寶龍亦提到，​希望工商界要支持香港、投資香港，​將好嘅資源吸引到香港、留喺香港，​為香港繁榮穩定注入更多活水。​譚耀宗表示，​夏寶龍係想鼓勵港商，​要對香港、未來及國家前景有信心，​而且仍然有好多發展機遇，​當有困難時，如果「有信心，衝得到上去」，​喺危難時唔需要退縮，​要掌握機會，​成功嘅話「你就最威喇」。​

被問到長和出售巴拿馬運河經營權一事，​譚耀宗指佢並非當事人，​唔清楚交易內容，​但企業應該守住「唔好益咗對手，損害國家利益」嘅大原則。​至於由中國買下經營權嘅提議，​譚耀宗話「國家有國家策略」，​只會指出問題所在。​喺經營權事上，​佢認為企業「捲埋入去有咩利益呢」，​又指如果有損失都不過係「錢銀問題啫」，​民族大義更加重要，​亦可以令人明白香港商界「唔係有錢賺就得」。​《I》