路透社報導，原本由英國同法國主導、籌備已久嘅「戰後派兵入烏克蘭維和」計劃，宜家正式被擱置。有關構思喺幾個月前仲係歐洲政壇焦點，唔少人認為可以為烏克蘭日後可能出現嘅停火協議提供安全保障。不過，消息人士直言，局勢變化加埋美國態度冷淡，連歐洲自己都開始打退堂鼓，主因係美國同俄羅斯雙方都唔支持有北約國家派兵落場，加上各國本身軍力、後勤、資源緊張，根本冇辦法成事。

歐洲唔落場唔代表冇得傾

本周四，法國巴黎再度召開「志願聯盟」會議，邀請咗約30個國家嘅領袖同代表出席，包括英國、加拿大、挪威、土耳其、烏克蘭等。預期將改為討論其他可行嘅支援方式，例如加強烏軍軍力、提供邊境防衛協助等等。一位歐洲外交官向傳媒表示：「當初喺烏克蘭情況仲算唔錯嗰陣，大家仲有信心派兵落場幫手，但宜家形勢急轉直下，加上美國總統特朗普喺俄烏戰爭上立場轉向，大家開始覺得冇咩吸引力。」

法國總統馬克龍同英國首相施紀賢早前曾到訪白宮，提出過派遣數千名士兵喺戰後進駐烏克蘭，協助監察停火同維持和平。但佢哋到而家都未能說服美國作出具體承諾。美國總統特朗普初時對歐洲提議派兵反應正面，仲話俄羅斯可能會接受。不過，最近美方官員轉趨保守，甚至有美方官員直斥歐洲嘅方案係擺姿態、扮嘢，冇實際意思。

雖然派兵維和計劃暫時唔再係主流選項，但唔代表歐洲就唔再理烏克蘭。一位歐洲防務高層話，個別國家依然可能派出軍人負責訓練烏軍，或提供後勤支援。而一份流出嘅峰會文件顯示，歐洲其實仍然有預備一個「未來維穩部隊」方案，係屬於戰後和平協議一部分，假如美國支持，呢支部隊就會入場。

法國總統府消息人士透露，華府官員對呢類計劃唔抗拒，仲表示一旦烏克蘭達成永久停火協議，美方歡迎歐洲出力。英國首相施紀賢上星期亦強調，軍方目前集中研究如何確保烏克蘭空域、海域同邊境安全，話「我哋唔知幾時會有協議，但一有就要即刻應對。」

意大利提出烏克蘭比照北約第5條

其實喺歐洲內部，唔少國家對派兵仍然有疑慮。一方面係擔心冇咗美國撐場，單靠歐洲自己太危險；另一方面係錢銀、兵力、裝備都唔夠，加上冇國際授權，唔想最終變成同俄羅斯正面開火。

一名歐洲軍方官員補充，雖然而家出兵機會渺茫，但討論本身都係重要一步，證明歐洲有行動能力，「唔可以淨係用幾多坦克、幾多飛機、幾多士兵去睇成件事，呢個係一個長線部署，可能要幾年先成熟。」

喺無法直接派兵落烏克蘭之下，歐洲可能改變策略。意大利總理梅洛尼提出，即使烏克蘭加入北約無望，可考慮比照北約第5條安全保障，保證一旦烏克蘭再受襲，歐洲國家會提供協助。美方官員表示，呢個構想可以傾。第三位歐洲外交官話：「呢種方式比實際出兵便宜得多，但安全保障效果同樣大。」

至於外傳由聯合國介入成立一支維和觀察部隊嘅方案。聯合國副秘書長就話依家談呢啲仍然屬「極度假設性」，而且要有成員國提出動議先可以行到。《I》