已故童星金賽綸家屬今（27日）中午召開記者會，現場公開多張金秀賢同當時年僅15歲嘅金賽綸之間嘅KakaoTalk對話截圖，內容鹹濕曖昧，爆出二人地下情已經長達6年之久——仲要喺女方未成年時就已經開始！

今次家屬聯同網絡節目《橫豎研究所》主播金世義同律師高調現身，唔止爆料咁簡單，仲直接擺出實證——對話中金秀賢講過：「我好想你」、「我好鍾意你」，仲有金句：「我任何時候都可以抱住你瞓覺」，現場一班記者聽到都即刻O晒嘴！

🔻 「唔想你，想你。」鹹濕對話逐句公開 曝光嘅對話來自2016年6月，即係金賽綸只有15歲嗰陣。截圖中見到佢哋日日都Kakao傳訊，內容超曖昧，金賽綸講：「我想你呀！」金秀賢就耍嘴皮：「你？唔想你，想你。」講到親親抱抱、瞓覺陪睡樣樣齊，幾乎係劇情級愛情小說咁誇張。

金賽綸仲報備自己去打點滴，金秀賢回覆得超體貼：「而家點呀？仲唔舒服？」「你開工未呀？我好擔心ㅠㅠ」表現得好似男朋友咁貼心，仲傳佢年紀細細時嘅相，令人唔禁諗多幾層！

🔻 戀情打死唔認　家屬爆金句：唔畀你再扮無辜！ 其實喺金賽綸喺2月16日輕生當日，正正就係金秀賢37歲生日。到3月10日，家屬透過《橫豎研究所》發聲，公開指控兩人拍拖6年。但金秀賢初時極速否認，之後又轉口風話：「係有交往過，但只係一年，而且女方成年後先開始。」

家屬見佢扮無辜扮到出神入化，終於忍無可忍：「你再咁講，我哋就擺你上枱！」結果，就係今日呢場爆炸級記者會，家屬正式宣戰，公開二人戀情證據，連私密合照都有傳聞話喺節目中曝光。

🔻 《橫豎研究所》繼續爆：小三小四都係當紅女星！ 呢場風波未完，昨晚《橫豎研究所》直播節目再掀高潮！主持金世義講到：「金秀賢唔止金賽綸一個！交往期間仲有小三小四，而且都係一講個名全韓國都識嘅一線女星！」不過出於法律考慮，節目將女星真名消音處理，身份暫時成謎。金世義仲話：「金秀賢根本坐擁三妻四妾，搞到金賽綸情緒大崩潰。我哋都覺得震驚，所以寧願消音都唔敢亂爆名。」

🔻 網民炸鍋：戀童？出軌？封殺佢啦！ 事件爆出後，韓網即時爆炸，網民群情洶湧，熱議「戀童」、「出軌」、「自殺」等關鍵字。《NAVER》、《DAUM》同各大討論區鋪天蓋地，全都圍住金秀賢開火：「仲想演偶像劇？痴線呀！」、「封殺佢啦！」、「咁樣對15歲嘅女仔，你好意思？」《I》