中國再爆出驚人非法代孕事件，一名年僅17歲、來自四川涼山彝族自治州嘅少女，被揭透過代孕機構安排，為一名年屆50歲嘅龍姓男子代孕，並成功誕下一對雙胞胎，當事人懷孕時其實只得16歲。事件經內地知名「打拐」志願者上官正義喺微博爆料後，立即引起網民關注同強烈撻伐，廣州市衛健委亦回應指，正由綜合監督處核實事件詳情。

根據內地媒體報道，上官正義指出廣州一帶出現一條完整嘅非法代孕產業鏈，涉及指定卵源、性別篩選以至非法取卵、胚胎植入等一系列地下操作，當中更涉及大量未成年少女。

根據爆料，呢類代孕機構聲稱可以按客戶要求提供卵子及代孕服務，甚至聲稱「可以揀胎兒性別」。提供卵子者按學歷定價，本科程度嘅「卵子」價格為10萬人仔，研究生則達要15萬人仔。至於代孕佣金，單胎價介乎18萬至20萬人仔，雙胞胎則介乎20萬至24萬人。

其中一宗個案中，一名來自江西、年約50歲嘅龍姓男子，花費超過90萬人仔安排代孕雙胞胎，而提供代孕服務嘅竟然係一名年僅17歲嘅彝族少女。上官正義披露，佢懷孕時其實只得16歲，事件引起廣泛關注。

上官正義指出，類似事件喺中國唔係第一次發生，早喺2023年就曾經揭發過未成年少女被安排代孕，而彝族地區少女涉及代孕產業嘅比例亦見偏高，情況持續惡化，逐步滲入未成年群體。對此，廣州市衛健委職員接受查詢時表示，當局綜合監督處已經着手調查，會依法跟進相關情況。

上官正義亦提到，類似黑市代孕操作唔單止存在喺廣州，佢曾於2023年11月揭發湖北襄陽、青島等地有醫療機構參與非法販賣嬰兒出生證明，更曾指控青島一間表面提供試管嬰兒諮詢服務嘅診所，實際上係非法「地下代孕實驗室」，進行非法取卵、胚胎移植等操作。

根據揭發，該實驗室提供嘅代孕服務基本收費為75萬人仔，若客人要求篩選胎兒性別則需加價至95萬人仔。而協助進行手術嘅醫護人員，包括主刀醫生、麻醉師等，每人都會收取數百至數千元酬勞。由於過程殘忍，有醫生坦言見到受捐者痛苦狀況後選擇唔再參與，更有女性需自備麻醉藥前往取卵。

上官正義警告，呢啲地下代孕黑產背後係龐大利益鏈，涉及拐賣、人口控制、醫療腐敗同未成年保護等問題，形容為「人倫悲劇嘅產業化」。佢呼籲中國當局應全面整頓代孕亂象，唔可以再對呢類非法行為視而不見。

中國現行法律仍然禁止任何形式嘅商業代孕，但黑市需求高企，非法產業鏈愈趨成熟。有評論指出，若無從制度層面正視地區發展不均、基層女性保護不足等問題，類似事件可能會越來越多。