美國總統特朗普繼續執行強硬移民政策。國土安全部（DHS）宣布，將會喺4月24日起，全面終止針對古巴、海地、尼加拉瓜及委內瑞拉四國國民而設嘅「臨時入境特許計劃」（CHNV parole programs），估計涉及人數超過53萬人，當中大多數人將面臨限期內離境或被遣返嘅命運。

國土安全部預計將喺3月25日喺《聯邦公報》正式刊登公告，並指相關政策係根據特朗普於1月20日簽署嘅行政命令執行，強調計劃唔再符合公共利益，對減少非法入境幫助有限，亦與現屆政府外交方針不符。

臨時入境計劃最初由前總統拜登喺2022年推出，先係開放畀委內瑞拉人，再喺2023年擴展至古巴、海地及尼加拉瓜國民，容許佢哋只要有美國境內擔保人，就可以合法搭飛機入境，逗留期限為兩年。

特朗普喺上任後火速叫停計劃，並於1月簽令撤銷所有分類式臨時入境特許，狠批拜登政府繞過國會、罔顧法律程序，稱呢啲措施已經越過憲法界線，同時令非法移民問題惡化。

國土安全部表示，喺4月24日之後，若果有受影響人士未獲其他合法身分，亦未自行離境，當局將會啟動快速遣返程序。根據特朗普時期遺下嘅政策，喺美國境內停留少於兩年但無合法身分者，可被即時遣返，無需經過冗長審訊程序。國土安全部同時強調，即使喺生效前30日內，亦保留隨時執法權力，有需要會即時採取拘留或遣返行動。

據路透社報道，特朗普政府未止步於此，更準備下一波「移民清理行動」，當中包括考慮撤銷約24萬名烏克蘭人喺拜登時期獲發嘅臨時入境資格。呢批人係喺俄烏戰爭爆發後經由特別人道渠道入境美國，至今仍有唔少人逗留境內。特朗普早前已經表示，「好快」會有最終決定。

較早前，特朗普援引1798年嘅「外國敵人法」（Alien Enemies Act），已經將238名委內瑞拉黑幫「阿拉瓜火車」（Tren de Aragua）成員驅逐至薩爾瓦多，並關押喺當地最高戒備監獄「反恐怖主義監禁中心」，呢座監獄可以收容最多4萬名囚犯，專門用嚟囚禁殺人犯、販毒集團成員同黑幫分子。

阿拉瓜火車係一個橫跨多國嘅犯罪組織，涉及綁架、勒索、販毒、組織犯罪同僱傭殺人等罪行。特朗普政府上個月正式將該組織列為「外國恐怖組織」，並展開大規模遣返行動。

據薩爾瓦多公開嘅畫面顯示，大批黑幫成員戴上手銬同腳鐐，喺特種部隊押送下，由飛機轉移至重裝甲車隊。黑幫成員喺抵達監獄後即時被剃光頭同鬍鬚，全部換上白色囚衣，被押送入監。《I》