美國聯合航空（United Airlines）一班飛上海嘅國際航班，居然因為一個令人啼笑皆非嘅原因中途折返——機長竟然冇帶護照。根據內地媒體《極目新聞》報道，出事嘅係3月22日下午，由美國洛杉磯飛往中國上海嘅UA198航班，起飛約三個鐘後突然轉航，緊急降落三藩市國際機場，而原因竟然係機長唔記得帶護照。

機長廣播親口話「Forget Passport」　乘客：無奈又搞笑

坐喺飛機上嘅于先生接受訪問時話，佢哋當時聽到機艙廣播講咗句英文「Forget passport」，然後機組人員用中文再解釋一次：「因為機長冇帶護照，飛唔到上海，要喺三藩市落機。」

事發時飛機已經飛咗超過兩個鐘，點知要臨時折返。落地之後，乘客收到航空公司派發嘅30美元餐券，但之後滯留咗三個鐘，等緊新安排。

更搞笑嘅係，據于先生講，飛機上有一位乘客本身就係喺三藩市搭機去洛杉磯轉機，結果搭搭吓又返番原點。當飛機安全降落後播出「Welcome to San Francisco」嗰句時，成機人都笑晒。

于先生話，呢件事搞到行程足足延誤6個鐘頭，原本預計喺北京時間星期日晚6點半落機，依家拖到星期一凌晨12點半先到。由於班機改期，有乘客喺社交平台話已經選擇改簽其他航班。

據估算，航班要緊急備降就要先放油，避免過重降落，單係燃油損耗就估計高達人民幣30萬元，航空公司可謂損失慘重。

美聯航：全球第三大航空公司

涉事嘅聯合航空（United Airlines），係美國一間大型航空公司，總部喺芝加哥威利斯大廈，主要樞紐機場係芝加哥奧黑爾國際機場。為咗避免同中國嘅「中國聯合航空」搞亂，喺中國內地通常叫佢做「美聯航」。

計機隊規模同航線數目，美聯航係全球第三大航空公司，僅次於美國航空（American Airlines）同達美航空（Delta Airlines）。如果以乘客飛行里數計，佢同樣排第三。

美聯航亦係星空聯盟（Star Alliance）創始成員之一，喺美國中西部同西岸營運大量國內航線，同時有跨大西洋、太平洋嘅洲際航班。佢亦係美國飛亞洲同夏威夷航線最多嘅航空公司之一。

聯合航空歷史亦唔平凡，曾經喺2002年12月9日向美國政府申請破產保護，成為歷史上最大規模同最長時間嘅航空破產案例之一，直到2006年2月1日先脫離破產狀態。之後喺2010年開始同「美國大陸航空」傾合併，最後喺2013年3月31日正式合併為一間公司。

當時兩邊貴賓室亦合併為「United Club」；而原本大陸航空嘅常客獎勵計劃「翼通天下」（OnePass）亦喺2012年初正式併入聯合航空自家嘅「前程萬里」（MileagePlus）計劃。《I》