《立場新聞》前總編輯鍾沛權被以「煽動罪」重判入獄21個月。《立場新聞》前董事、大律師吳靄儀早前喺《明報》撰文為鍾打氣。呢篇文章即刻被保安局長鄧炳強點名批評，話吳靄儀係「英雄化」被告，甚至引用法官講鍾「並非進行真正嘅傳媒工作」。但有《立場》前資深記者強烈反駁，指官方嘅指控對一生捍衛新聞自由嘅鍾沛權係「極大侮辱」，並形容鍾係「最硬淨、最有腰骨，能夠喺困難時刻堅守原則嘅人」。

吳靄儀喺9月30日喺《明報》發表題為〈權撐住〉嘅專欄文章，為鍾沛權打氣。佢喺文中提到，有人曾建議鍾「不如認罪求取三分之一減刑」，但鍾選擇咗拒絕，因為佢要為自己嘅新聞信念堅持到底，寧願經歷漫長嘅審訊，為新聞自由留下公共紀錄。吳靄儀仲憶述，鍾沛權「瘦長個子，偏偏生就一股牛勁」，無論面對財政困難或者嚴峻形勢，佢都會堅持捱住，直至最後一刻。

然而，鄧炳強隨即發信去《明報》投訴，批評吳靄儀嘅文章「拐彎抹角、指桑罵槐」，話佢係美化鍾沛權嘅犯罪行為成為所謂嘅「新聞工作」。鄧炳強仲引述法官嘅話，話鍾當時並非做緊真正嘅傳媒工作，而係參與所謂抗爭。

對此，《立場新聞》前採訪主任林彥邦表示完全無法接受。佢直言，呢種指控對於一個為新聞自由捱咗一生嘅人嚟講，係一個極大侮辱。林彥邦質疑鄧炳強再次向媒體施壓，打壓言論空間，「連一篇打氣嘅文章都容唔下」。

林彥邦話：「一個評論人或者新聞工作者，評論法官嘅做法，就會被視為煽動。但法官竟然有無上嘅權力隨便指控一個新聞工作者，話佢唔係做緊新聞工作，呢樣嘢係非常荒謬。」佢補充，當時《立場新聞》登咗數以十萬計嘅文章，但法官只係拎咗其中部分，就話鍾沛權係煽動人哋去示威。

林彥邦繼續話：「我喺呢行做咗18年，做過5至7間公司，跟過唔同嘅中高層、老行尊、大前輩，我唔敢話鍾沛權係做新聞最好嗰個，但我肯定佢係我見過嘅老闆入面，最硬淨、最有腰骨、最能夠喺困難時堅持原則嘅人。」

林彥邦又指，鍾沛權幾乎將所有時間都奉獻咗畀新聞工作，幾乎當公司係屋企咁，「連社交平台小編、寫稿都甘願自己搞掂」，即使面對一浪接一浪嘅風波、自己未審先押都照樣好鎮定。《I》