美國新興新聞機構Semafor喺今（18日）發表獨家報道，指根據兩名知情人士透露，美國總統特朗普正考慮承認克里米亞地區係俄羅斯領土，作為未來結束俄羅斯對基輔戰爭協議嘅一部分，甚至是否要敦促聯合國一齊承認克里米亞屬俄羅斯。另外，特朗普週日晚上亦向記者透露，談判團隊已經開始討論「分割某啲資產」，當中涉及嘅資源可能成為和談條件之一。

不過報道強調，特朗普尚未作出最終決定，而承認克里米亞屬俄只係眾多可能選項之一。至於美國政府會否正式推動呢個方案，暫時仍然存在變數。對於呢項消息，白宮選擇不作回應。國家安全委員會發言人喺報道刊出後發表聲明，強調美國政府從來冇作出過咁嘅承諾，亦唔會透過媒體進行任何談判。

美國官員曾公開表示，烏克蘭必須向俄羅斯作出領土讓步，咁先可以換取戰爭結束。而特朗普本人亦多次表明，佢願意考慮將克里米亞納入俄羅斯版圖。不過，特朗普顧問團隊一直未有對外公開透露會提供乜嘢條件俾普京。

報道認為，美國如果推動正式承認克里米亞屬俄，勢必引起歐洲國家同烏克蘭政府強烈反對。烏克蘭總統澤連斯基一直堅決反對向俄羅斯割讓任何土地。雖然俄軍早已控制克里米亞，但美國、烏克蘭同國際社會大部分國家仍然認定克里米亞係烏克蘭領土。

同時，軍事專家普遍認為，烏克蘭軍隊透過軍事手段奪回克里米亞機會渺茫。就算係澤連斯基本人，佢喺舊年都承認，要透過外交方式先可以實現克里米亞回歸，而俄羅斯願意妥協嘅可能性極低。

其實，喺俄羅斯全面入侵烏克蘭之前，特朗普已經曾經提出過承認克里米亞屬於俄羅斯。早喺2016年佢競選總統期間（以及之後第一個任期內），特朗普多次講過，佢會「考慮」美國是否應該承認克里米亞。

特朗普喺2018年接受美國廣播公司（ABC News）訪問時更表示：「據我所知，克里米亞人民寧願同俄羅斯一齊，而唔想回歸原來嘅地方。呢點必須考慮。」

特朗普喺週日接受訪問時透露，過去呢個周末，談判團隊已經完成咗大量工作，俄烏談判重點將圍繞土地同發電廠等問題，雙方亦曾經討論瓜分部分資產，並相信今次談判有好大機會令戰事告一段落。

佢話：「我覺得我哋會傾土地，涉及範圍非常廣大。如果大家了解情況，就會知道呢場戰爭之後，局勢將會與戰前完全唔同。我哋會傾土地，亦會傾發電廠，呢個問題好大，但我覺得雙方已經談得七七八八。」佢所講嘅發電廠，顯然係指歐洲最大嘅札波羅熱核電廠。

《紐約時報》分析指出，特朗普呢番言論等於變相就俄羅斯喺今次侵略戰爭入面究竟可以獲得幾多利益進行談判。白宮內部幕僚曾暗示，俄羅斯極有可能最終保住克里米亞。

回顧歷史，二戰結束前嘅1945年2月，克里米亞雅爾達會議亦曾經令蘇聯獲得大量利益，今次戰爭可能亦會延續歷史發展軌跡。《I》