近排北京當局頻出大招，意圖挽救中國經濟。今（26日）中央政治局召開會議，習近平放話必須「完成全年經濟社會發展目標任務」。彭博引述知情人士稱，當局正考慮向大型國有銀行注入高達1萬億元人民幣。

據官媒《新華社》報道，中共中央總書記、國家主席習近平喺政治局會議上強調，要冷靜面對當前嘅經濟狀況，加強責任感同緊迫感，確保全年經濟發展目標能夠達標。

會議指，喺房地產方面，要促進樓市止跌回穩。具體措施包括嚴格控制新樓供應量、優化存量同提升樓宇質量。會議提出，要加大「白名單」項目貸款力度，支持將閒置土地盤活利用。另外，亦都考慮放寬現行嘅住房限購政策，並且降低存量房貸利率。會議強調，要從土地、財稅同金融等多方面著手，推動房地產市場建立新嘅發展模式。

中國大型銀行近年嚟被要求加大對房地產開發商、購房者同地方政府融資平台嘅支持，以幫助提振經濟，但隨住壓力不斷增加，呢啲銀行亦都面臨住資本不足嘅問題。

《彭博社》引述消息報道，中國政府考慮向大型國有銀行注資高達1萬億人民幣，增強佢哋嘅融資能力，支持經濟發展。呢個計劃如果落實，將會係自2008年全球金融危機以來，中國首次向大型銀行注資，呢筆資金將主要來自發行特別國債。

今日召開嘅政治局會議內容，就同彭博社報道不謀而合。會議指出，要加大財政同貨幣政策嘅逆周期調節力度，確保必要嘅財政支出。同時，會考慮發行超長期特別國債同地方政府專項債，降低存款準備金率，並且實施有效嘅降息政策。

最近，中國監管部門宣佈一系列措施，包括全面降低房貸利率同下調政策利率，希望藉此重振經濟。國家金融監督管理總局局長李雲澤喺早前嘅新聞發布會上表示，計劃對六家大型商業銀行增加核心一級資本，但佢並冇透露更多細節。