台灣《中央社》報道，上星期中共三中全會作出嘅「決定」提到，要根據自願同彈性原則，穩步推進漸進式「延遲法定退休年齡」改革，意味住中國將會設立法定退休年齡，實施彈性退休制度，可以自願延後退休。

而家中國嘅退休年齡係根據上世紀70年代國務院制定嘅暫行辦法，男性60歲、女幹部55歲、女工人50歲就要被強制退休，依家呢個制度已經唔合時宜，應付唔到而家人口同勞動力老齡化嘅情況。

根據中國媒體《第一財經》報道，上星期中共開咗二十大三中全會，作出咗「中共中央關於進一步全面深化改革 推進中國式現代化的決定」。呢個決定昨日公佈嘅全文首次提出要「自願、彈性」作為延後法定退休年齡嘅基本原則。

呢個決定喺第46條提到，要健全人口發展支援同服務體系，積極應對人口老齡化，完善養老事業同養老產業嘅政策機制。按照自願同彈性原則，穩妥有序推進漸進式「延遲法定退休年齡」改革。

報道指出，而家中國嘅退休制度有兩大特點：一係法定退休年齡偏低，女工人50歲、女幹部55歲、男性60歲，喺國際比較下，中國係世界上法定退休年齡最低嘅國家之一；二係實行強制退休制度，勞動者一到法定退休年齡就必須強制退休，僱主有權終止佢哋嘅工作。

報道仲提到，好多發達國家實行彈性退休制度，唔會實施一刀切，會用經濟手段調節退休年齡嘅激勵同約束機制。勞動者到咗法定退休年齡後，如果身體健康又想繼續做嘢，僱主無權拒絕。同時，對於晚退休嘅人，國家仲會喺養老金上畀獎勵。

北京清華大學醫院管理研究院教授楊燕綏指出，呢個決定中一個好突出嘅新意就係明確提出「法定退休年齡」，因為而家中國嘅退休年齡係政策規定，冇相關嘅法律制度。二十大三中全會之後，中國要根據國民平均預期壽命同大數據建立法定退休年齡，亦都要有相應嘅勞動年齡人口界定制度。

楊教授仲話，中國喺「自願、彈性、法定退休年齡」呢三個新嘅基礎上，穩妥有序地推進漸進式延後退休，積極應對人口老齡化同勞動力市場需求。漸進式嘅彈性退休制度有助就業人員由數碼經濟崗位轉向照顧經濟崗位，對勞動力市場轉型同解決結構性失業有多重意義。

中國社科院世界社保研究中心執行研究員張盈華指出，呢次決定提出按照自願同彈性原則，將選擇權畀返個人，個人可以根據自己情況做出最合適嘅選擇。按照「自願」原則，個人可以喺幾個年齡節點揀延退；按照「彈性」原則，對自願延退嘅人會畀激勵，適當提高養老金。

張盈華表示：「一般來說，政策可能會是設置一些延退年齡段，由個人選擇，多延多得，但一經選定不可改變，不會是想延多少就多少」《I》