8月18日，唐時達不服湘潭大學第二次撤銷佢本科學歷嘅行政訴訟，喺湖南湘潭市岳塘區法院開庭。弟弟唐一達以第三人身份出庭。截至8月19日公開可查報道，法院未見判決。呢單案一定要由頭講，否則大家會聽到一頭霧水。

第一條線係樓。2012年，兩兄弟家中買入北京西城一套房。因為弟弟唐一達有北京購房資格，房屋登記喺弟弟名下。哥哥唐時達一方話，實際出資同供樓主要係自己同母親，只係借弟弟個名買樓；弟弟就話，房屋喺自己名下，唔係單純借名。呢個問題本來唔難查。邊個畀首期？邊個供樓？錢由邊個戶口轉出？中介費、稅款、管理費邊個畀？睇銀行流水，睇貸款紀錄，基本上就知道實際出資人係邊個。但即使證明係哥哥出錢，用人哋名義繞過限購，本身亦有法律風險。所以樓呢條線，本來已經係一個灰色操作。

第二條線先係學歷。兄弟因房產反目之後，弟弟唐一達向湘潭大學舉報哥哥，話2001年真正以「唐時達」名義考上湘潭大學嘅人係自己，哥哥原本叫「潘濤」，後來冒用「唐時達」呢個身份去讀書。弟弟自己之後改用「唐一達」身份，翌年考入中國人民大學。

如果呢個指控成立，咁就唔係普通家庭糾紛，而係冒名頂替上大學。佢牽涉嘅唔只係一張文憑，而係高考錄取資格、戶籍、學籍、身份檔案，甚至後來嘅碩士、博士、博士後、北京戶口同工作履歷。呢啲如果係假，撤銷學歷係應該；但同時亦應該追查，當年邊個幫佢過關。

第三條線係最荒謬：兩個人到底係咪雙胞胎。母親話兩兄弟係雙胞胎，細個分開撫養，所以入學年份唔同，各自考入大學。弟弟就話唔係，哥哥大佢一年。呢啲本來唔應該拗七年。出生紀錄、戶籍底冊、接生資料、鄰居親友、小學中學同學，全部都可以查。就算1980年代農村醫院紀錄未必完整，但一個人由細到大總有生活軌跡，唔會憑空消失。

我自己都聽過類似荒謬例子。2010年我喺三峽搭船，問一個侍應，點解一胎政策下佢仲有家姐？佢話家姐出世冇報戶口，三年後佢出世，屋企先一次過報，報成兩個係雙胞胎。呢啲就說明，喺過去戶籍管理混亂年代，「雙胞胎」有時唔只係生物學問題，亦可能係戶籍操作問題。所以今次更加應該查清楚：係真雙胞胎，定係戶籍上被做成同日出生？

第四條線係名字。唐時達、唐一達、潘濤，究竟邊個係邊個？有冇改名？幾時改？邊個派出所辦？學籍檔案點寫？高考報名表點寫？呢啲唔係哲學問題，係檔案問題。兩個唔同嘅人一定有唔同生命軌跡：讀過邊間小學、中學，邊個班主任，邊班同學，邊一年高考，邊個去大學報到。查人證、查檔案，應該可以對得上。所以我最唔明嘅係，呢件事點可以拖到七年？

如果真係冒名頂替，呢件事本質上唔應該只係學校內部撤銷學歷，更加唔應該只係民事糾紛旁枝。它可能牽涉冒用身份、偽造戶籍、偽造檔案、招生環節失職，甚至有人濫用職權。呢啲係公安、教育、紀檢都應該介入嘅嚴重調查。你查一個人當年係咪本人去高考、去報到，有相、有簽名、有同學、有老師、有戶籍、有檔案，點會完全查唔到？

但現實就係，案件變成一塌糊塗。樓係民事案，學歷係行政案，戶籍又係公安系統，學籍又喺學校同教育部門。每個系統只處理自己嗰一截，冇人將整條身份鏈一次過攤開。法院好多時又只係審查行政行為是否合法，唔一定完整重建二十幾年前嘅身份真相。結果就係，最應該一曝光就真相大白嘅事，反而變成長期文字訴訟。

2018年，湘潭大學第一次撤銷唐時達本科學歷，之後引發碩士、博士、博士後、北京戶口一連串後果。唐時達打官司。2025年8月，湖南高院撤銷學校第一次決定，理由係主要證據不足、違反法定程序。但高院撤銷第一次決定，唔等於判定一定冇冒名頂替。之後湘潭大學重新調查，2025年11月第二次撤銷學歷，唐時達再告學校。

所以今次真正要問嘅唔只係唐時達有冇頂替，而係中國呢套身份同教育治理點解可以混亂到呢個地步。樓有銀行流水可以查，出生有戶籍同接生資料可以查，改名有戶籍變更可以查，高考有報名錄取資料可以查，入學有照片簽名同同學老師可以查。咁多可以查嘅客觀材料，最後竟然查成七年都仲係各講各話，呢個先係最大荒謬。

如果唐時達真係冒名頂替，應該撤銷學歷，亦應該追究當年幫佢過關嘅人。相反，如果證據唔夠，學校亦唔可以用一個含糊嘅行政決定，摧毀一個人二十幾年教育履歷。呢宗案最可怕嘅唔係兄弟反目，而係本來應該由制度查清楚嘅事，最後變成制度本身都講唔清楚。