2024年底曾經直言中國經濟問題、更公開表示過去3年中國經濟增幅被高估10個百分點，而觸怒中國當局嘅中國國投證券首席經濟學家高善文，最近突然從國投證券離職，原因至今唔明。

台灣中央社引述中國證券報今日報道，兼任國投證券旗下「國投產業研究院」院長嘅高善文，不但已經離職，而且喺中國證券業協會網站上，都已經查唔到任何有關高善文嘅資料。高善文喺2024年12月曾喺國投證券一場內部投資講座上，公開發表言論，指出過去3年中國經濟增幅每年平均被高估約3個百分點，累計可能高達10個百分點。

當時就已經傳出高善文被國投證券開除嘅消息，不過消息隨後被迅速闢謠，當時高善文喺中國證券業協會官網上嘅資料仲係冇變動。根據報道，高善文最近一次公開亮相係今年9月18日，以北大金融校友聯合會會長嘅身份，以視像方式向北京大學「全球金融論壇」嘅歡迎晚宴致詞。

2024年12月3日，國投證券喺深圳舉行2025年度投資策略會，高善文當時喺會上表示，新冠疫情以嚟，中國社會隨處可見嘅現實可以總結為：「生機勃勃的老年人、死氣沉沉的青年人、生無可戀的中年人」。高善文分析指出，老年人嘅退休金預期係可按時足額發放，未來每年仲有穩定增長；相對之下，年輕人對未來收入增長嘅預期同確定性就大幅下降，紛紛開始「節衣縮食，關燈食麵」，導致消費被嚴重抑制，進一步加劇經濟困難。

佢更加直言，根據物價、就業及GDP細項數據對比得知，自從疫情同房市泡沫爆破呢幾年以嚟，中國經濟增長數據每年平均可能被高估咗約3個百分點。過去幾年嚟，累計經濟總量高估大約有10個百分點。而呢10個百分點嘅高估，同城鎮就業累計損失嘅4700萬個勞動力相當，約佔城鎮就業總人口嘅10%，數字相當吻合。

高善文發表上述言論後唔耐，佢嘅社交平台帳號即刻被封禁，不過當時佢喺國投證券嘅職務仍然被保留。然而，《華爾街日報》今年1月報道指出，高善文喺2024年12月發表上述言論觸怒當局之後，同年12月中旬再喺美國華府一場論壇上再次質疑中國GDP增幅，惹來中共總書記習近平極大不滿，習近平更親自下令調查同處分高善文。

而喺高善文之前，中國社科院經濟研究所副所長朱恆鵬早喺2024年8至9月間已經被調查，仲被拘留同免職，原因係佢喺一個私人聊天群組入面批評咗習近平對中國經濟嘅管理，更曾經涉及習近平個人生死嘅「含蓄言論」。