近日日本同中國因為台灣問題再度陷入緊張關係，特區政府亦緊跟北京嘅對日政策，特首李家超今日指出，保安局會密切留意事態發展，香港嘅航空公司亦會作出調整行程安排。與此同時，日本防衛大臣小泉進次郎就表示，喺鄰近台灣嘅與那國島部署飛彈嘅計劃正如期進行。

中國外交部今日再度強調，絕對唔會容許日本軍國主義死灰復燃，中方有決心亦有能力捍衛國家領土主權。據央視新聞報道，中國外交部發言人毛寧今日主持例行記者會。有記者問到，日本防衛大臣23日視察琉球群島一處自衛隊基地時表示，日本將如期喺該基地部署中程防空飛彈，而該基地所在地（與那國島）距離台灣僅110公里，中方點睇呢件事。

毛寧指，日本喺鄰近台灣嘅西南諸島部署進攻性武器，「刻意製造地區緊張，挑動軍事對立」，並將之聯繫到日本首相高市早苗嘅「涉台錯誤言論」，認為呢啲動作「極其危險，需要引起周邊國家及國際社會的高度警惕」。

毛寧續稱，日本嘅「和平憲法」原則上係確立咗「專守防衛」，但近年日本不斷大幅調整安保政策，防衛預算逐年增加，更放寬武器出口限制，試圖發展進攻性武器，甚至圖謀放棄「無核三原則」。毛寧表示，中方絕對唔會容許日本右翼勢力「開歷史倒車，絕不允許外部勢力染指台灣，絕不允許日本軍國主義死灰復燃。中方有決心有能力捍衛國家領土主權」。

自從高市早苗發表「台灣有事」嘅講話之後，中方就一直表達強烈不滿。日本防衛大臣小泉進次郎23日訪問沖繩縣與那國島，視察陸上自衛隊與那國駐屯地時表示，當地部署飛彈嘅計劃正如預期進行。外媒引述小泉進次郎稱，「呢項部署有助降低我國（日本）遭受武裝攻擊嘅可能性。認為呢個做法會加劇區域緊張嘅講法係唔正確嘅」。與那國島係日本最西端嘅島嶼，距離台灣僅得111公里，被視為日本喺「台灣有事」時嘅第一線防衛據點。日本陸上自衛隊早喺2016年就喺與那國島設置咗駐屯地。

特首李家超今日表示，日本首相高市早苗早前發表嘅「涉台言論」令到好多交流成效存疑，港府會密切留意事態發展，強調「相關安排必須符合國家尊嚴同港人利益」。李家超今日下午接受媒體訪問時首次就中日關係惡化表態，佢表示日本領導人嘅相關言論係「極其錯誤嘅」，嚴重惡化中日之間嘅人員交流氣氛，亦令好多交流嘅成效成疑。佢強調港府會密切監察相關事態發展，並表示「我哋嘅安排必須符合國家尊嚴同港人利益」，會繼續留意國家嘅立場同政策。

李家超又指出，港府支持中國對日本嘅外交政策，香港保安局已更新外遊警示網頁資料，提醒赴日或喺日本嘅港人應該提高警惕同注意安全，保安局會密切留意事態發展，香港嘅航空公司亦會作出調整行程安排。

近日中日關係惡化，特區政府亦緊跟北京嘅對日政策，例如教育局日前證實退出咗由日本官方主辦嘅「21世紀東亞青少年大交流計畫」，取消下月派中學生赴日交流嘅安排。日本共同社亦報道，港府官員已停止同日本駐港總領事館人員嘅交流。此外，香港投資推廣署上星期舉辦一項日港企業交流活動時，亦要求日本總領館人員唔好出席，結果活動要延期舉行。