《YAHOO新聞》報導，日前中方通報暫停進口日本海產威嚇日本，揚言「唔會有市場」，但近日日本水產價格，並未有因此大跌。翻查背後原因，原來日本水產業界早喺近年成功開拓國際市場，部署從供應層面「擺脫中國倚賴」，將水產品改運往美國同東南亞，其中北海道扇貝賣去歐美，甚至比賣俾中國取得更好價格；今年日本獲批復運中國嘅地點，原來得3個，只佔業界申請總數0.4%，中國「狠招」嘅影響似乎有限。

中日本來喺11月初開始恢復水產貿易，主要係扇貝、鮑魚同海參，當中首批貨物6噸北海道產冷凍扇貝亦於11月5日出發運去中國，數百公斤海參於11月10日發去中國，然而到咗中日關係交惡，呢啲水產品部分遭以檢查等技術原因暫停進口。

中國出招反制後，日本水產業界對事件主要持兩種態度，一方係扇貝同海參業內人士，因為對中國市場抱有期待，所以難免失望，而另一方則早意識到同中國貿易有風險，慎重睇待重啟出口。

不過從實際數字分析，事件對兩者嘅影響都相當有限，據報宣布復運以嚟日本有697家水產設施向中國提出申請出口，但獲得批准註冊嘅原來只有3間，其中北海道得1家。因此今次中方停運，主要影響該3間水產設施，令中國市場回到自2023年開始禁運嘅情況，據報連豐洲市場（東京都江東區）亦因為本來就唔批准復運而唔受影響。

對上一次中國禁運日本扇貝，扇貝價格走弱，而家卻未見到同樣現象。原來喺呢兩年間，日本水產業界已經將水產品改運其他地區，部署「擺脫中國倚賴」；據日本農林水產數字，日本扇貝喺禁運前51.3%外銷中國，依次台灣佔12.3%、美國佔8.6%，經過兩年超前部署後，中國市場為零，美國市場已佔到日本扇貝總出口量27.5%，成為咗第一大市場，台灣佔17.5%、越南佔15%、韓國佔11%，越南同美國成功填補咗中國市場缺口。

據日本經產新聞今年初訪問漁民，漁民們本來就對重啟中國市場較為慎重，據漁民透露，喺中國本來賣3000日元1公斤嘅扇貝，已改為以1公斤5000日元嘅價格賣去歐美，價格變得穩定，而且賣去歐美可賺更多。

據報豐洲市場嘅急凍扇貝，今年5月底時批發價達到每公斤5500日元，大幅超越運去中國嘅批發價，當時有批發公司接受《日經》訪問時稱，扇貝供應本來就不佳，連日本國內都缺貨。除咗日本扇貝外，近兩年養殖鰤魚亦由每公斤900日元，升至每公斤1500日元，養殖鮭魚都漲價兩成，價格反映日本水產本來就唔愁銷路。

中國嘗試以水產經濟威嚇日本，威力可能相對有限，但中國外交部稱日本水產喺中國「唔會有市場」可能係真實講法，皆因日本水產價格正呈現上揚趨勢，日本大型鮮魚經銷商魚力嘅會長曾預測，今年日本嘅魚價仲可能會繼續上漲，眾所周知中國餐飲市場「內捲」嚴重，內地百幾蚊就可以食海鮮大餐，似乎本來就唔太適合購入日本食材。