近年中國內地醫生薪酬普遍下降，幅度普遍高達三成甚至一半，仲有人揭發，一啲細縣城嘅醫生人工慘淡到要走去兼職送外賣。有專家分析，中國醫生嘅薪酬模式可能會由現時以績效人工為主，逐步轉變為固定人工為主。

市場研究機構「華醫網」6月發表咗一份《醫療人才2024年薪酬及就業調查報告》，調查接近3萬名醫護人員，發現2024年薪酬下跌嘅比例高達57.9%，主要因為績效獎金被大幅削減，對比2023年嘅37%，短短一年就增加咗成20個百分點，顯示醫生人工下調嘅趨勢正急速惡化。

其實大陸醫生減薪潮唔係新鮮事。經濟觀察網11號報導，有北京頂尖三甲醫院嘅神經內科醫生透露，過去七、八年嚟，醫院一直用變相方式降薪，例如升職後人工冇跟足以往嘅比例增加，同埋疫情後每季都用「溫水煮青蛙」方式，將薪金削減3%至5%，兩年落嚟加埋已經跌咗超過20%。醫院高層亦不停提醒員工，要做好準備過苦日子。

報導引述上海資深醫院管理人員李鳴表示，醫生人工減少已經成為全國大趨勢，好多基層醫院醫生月入跌到剩低二、三千人民幣，甚至有啲欠發達地區嘅醫院連基本人工都發唔出，逼到醫生要兼職開網約車或者送外賣搵食。佢話：「上海的情況還不至於這麼嚴重，但有些醫院醫生收入也降了10%至15%。」

另一位受訪醫生表示，佢透過同行了解到減薪情況相當普遍，今年至今，醫生嘅總收入普遍已經跌咗三至五成。多位受訪嘅醫生認為，經濟大環境差、醫保控費嚴格、同埋醫院大規模建設工程，係導致醫生薪酬持續下滑嘅三大主因。

《南風窗》雜誌2號引述一位一線城市三甲醫院嘅外科醫生話，佢所在醫院嘅醫療收費冇如期上調，同時檢查同檢驗收費仲一路下降，加上病人求診同治療嘅態度越嚟越保守，令醫院總收入銳減。

佢又同市內其他醫生交流後發現，有醫院績效人工遲出兩三個月已經係家常便飯，仲有啲甚至要遲成半年先出到糧。中國醫生嘅薪酬分為固定人工同績效人工兩部分，而績效人工就佔到總收入七至八成。

有公開資料顯示，大陸公立醫院嘅營運資金超過六成係靠醫院自己搞掂，政府補貼只佔約一成。龐大嘅營運壓力迫使醫院透過削減人力成本嚟維持運作，受害嘅往往係前線醫護人員。

報導提到，有分析指問題根源在於公立醫院一直行緊「自負盈虧」嘅市場化邏輯，而醫生薪酬制度又直接同醫院收入掛鈎，咁樣做法令醫生成為醫院營運壓力嘅直接受害者。如果改為固定人工制度，反而更加有利於維持公立醫院嘅公益性。近日，中國國家衛健委已經強調要逐步提高固定薪酬等穩定收入嘅比例，仲會建立動態調整機制，同時研究動態縮細各間醫院之間嘅人工差距。