中國短影音平台TikTok喺美國嘅命運終於塵埃落定！根據中國媒體《觀察者網》報導，美國總統特朗普喺香港時間9月26日凌晨正式簽署行政命令，確認TikTok最新嘅美國營運方案符合美國法律規定。呢個新方案嘅核心，就係成立一間專門負責保障TikTok喺美國嘅資料安全同內容監管嘅合資公司。美國副總統萬斯（JD Vance）仲透露，呢間公司估值高達140億美元。

新營運方案全貌曝光　兩間公司雙主體分工

報導指出，呢間全新成立嘅公司，正式名稱叫做「TikTok美國資料安全合資公司」（TikTok USDS Joint Venture），而唔係TikTok喺美國嘅整體業務公司。據《彭博社》早前報道顯示，TikTok喺美國嘅整體業務估值更加接近400億美元，換言之，呢間合資公司僅係整體業務價值嘅一部分

《觀察者網》又強調，過去美國傳媒雖然多次報導過TikTok嘅新方案，但多數都只係提到局部細節，未能完整呈現全局。今次佢哋綜合咗特朗普行政命令、各國媒體報導，以及上海復旦大學國際政治系教授沈逸從權威渠道取得嘅最新資訊，首次完整咁以圖像方式展示新方案嘅全面架構。

報導顯示，新方案分別涉及兩個營運主體：

• 第一個主體係「字節跳動TikTok美國公司」（BD TikTok US），由字節跳動100%持股，主要負責TikTok喺美國嘅核心商業業務，例如電子商貿、品牌廣告、跨境業務合作、全球產品及工程技術支援等等。
• 第二個主體就係今次焦點嘅「TikTok美國資料安全合資公司」（TikTok USDS），專責處理美國法律要求嘅資料安全、內容審核，以及App上架批准等本土化業務。特朗普口中所講、估值140億美元嘅公司，正正就係呢間合資公司。

字節跳動成最大單一股東

新合資公司嘅股權結構亦都相當特別，明顯係特意設計嚟滿足美國嘅監管要求。根據方案：

• 字節跳動將持有19.9%嘅股份，持股比例刻意低於20%，就係要避開美國法律限制；
• 字節跳動現有嘅全球股東則合共持有30.1%；
• 其餘最大嘅50%股份將由新加入嘅美國投資者擁有。

雖然字節跳動股份唔多，但佢仍係單一最大股東。不過董事會7個席位入面，字節跳動只佔一席，現有全球股東擁有兩席，新投資者則攞到三席，最後一席係由董事會一致任命嘅獨立董事。呢個安排顯示美方明顯係想確保合資公司嘅實際控制權掌握喺美國手上，避免中國母公司直接操控。

TikTok演算法知識產權　仍由字節跳動控制

最敏感嘅演算法問題上，報導亦首次明確表示，TikTok嘅演算法知識產權繼續由字節跳動持有，而唔會直接轉讓畀美國公司。合資公司會獲授權使用呢啲技術，但需要向字節跳動支付授權費，形成一種技術授權嘅關係，避免美國完全取得演算法嘅控制權。

報導亦提到，兩間公司將會建立一個商業收入分成機制，呢個安排引起市場高度關注。據沈逸教授透露，字節跳動透過佢美國嘅子公司「字節跳動TikTok美國公司」繼續從事核心商業活動，包括電商、廣告等等，而新嘅「資料安全合資公司」由於負責嘅內容保障、數據安全呢啲本身並唔係營利業務，所以會透過合理嘅商業收入分成機制，確保公司營運嘅資金供應。報導亦指出，可以參考其他科技公司嘅收入分成模式，推算未來TikTok內部嘅分配安排。

今次TikTok喺美國嘅新營運方案，報導仲形容，基本上同蘋果公司喺中國嘅「雲上貴州」模式係如出一轍。由於TikTok嘅美國數據安全服務商甲骨文（Oracle）總部設喺德州，坊間已經戲稱呢套方案為「雲上德州」。