英國極右政黨「改革黨」（Reform UK）近日再度挑起移民爭議。該黨早前提出激進方案，揚言一旦執政，就會廢除現時外來移民居英滿五年即可申請永久居留（ILR）的制度，改為每五年一次續期嘅工作簽證。呢個講法一出，引發移英港人憂慮，擔心「BNO簽證計劃」會受到波及。不過，改革黨黨魁法拉奇（Nigel Farage）喺周三接受訪問時態度急轉，公開澄清指香港人同烏克蘭人屬於「真正嘅難民」，並強調呢兩類人一般唔依賴社會福利，反而係最勤奮同最成功嘅群體。

雖然改革黨目前喺650席嘅國會入面淨係有5席，但其民望近月急升，以28%支持率領先在野工黨8個百分點。正因如此，法拉奇對移民政策嘅每一句說話，都引起政壇高度關注。保守黨國會議員董勤達（Tom Tugendhat）隨即出聲，喺社交平台X明確表示，BN(O)港人屬於英國國民，應該受到保障，「英國而家需要正式承認呢一點。」

佢喺24日（周三）早上接受英國 LBC 電台主持 Nick Ferrari 訪問時聲稱，未來3年會有多達130萬人透過ILR制度攞到永久居留，呢個數字同佢早前（22日）講嘅80萬人完全唔同。法拉奇更進一步聲稱，呢批移民會為英國帶來超過2000億英鎊（約2.1萬億港元）嘅龐大財政負擔。

主持人即場反駁，指法拉奇引用嘅數據來自右翼智庫「Centre for Policy Studies」，但該機構其後已承認數字有誤。面對質問，法拉奇改口稱「無論點都好，呢啲移民帶來嘅財政開支一樣巨大。」法拉奇堅持批評現行制度，話有唔少移民「利用ILR制度專登攞福利，仲透過受養人制度大批帶親屬入境」。佢主張以工作簽證取代ILR，強迫移民必須工作、交稅，避免成為社會開支嘅沉重負擔。

當主持人追問點睇烏克蘭人同香港人時，法拉奇就語氣軟化，指佢哋嚟英國嘅原因唔同，屬於「真正難民」。佢補充話：「如果你認真睇數據，真正嘅難民通常唔會依賴社會福利，相反佢哋好多時候係最勤奮同最有成就嘅人。」至於阿富汗人，法拉奇則劃清界線，指屬於「另一類別」。

法拉奇再度重申，英國移民體系已經「不可持續」，因為人口持續上升，社會福利開支同樣失控。「而家領取通用津貼（Universal Credit）嘅人入面，每6個就有1個係海外出生，呢個情況唔可以再繼續。」目前未有確實消息指改革黨會否正式修訂佢哋嘅移民政策。不過，多數分析認為，法拉奇今次嘅「補救式轉向」，其實係回應社會反彈同政治現實。