英國改革黨領袖法拉奇（Nigel Farage）近日再拋震撼彈，公開表明如果改革黨喺下屆大選勝出，將會徹底推翻現行嘅移民制度，直接廢除永久居留權（Indefinite Leave to Remain，簡稱ILR）。佢更加語出驚人，話持BNO護照移居英國嘅香港人「一個都唔會攞到」永久居留。

法拉奇：移英港人沒一個可取得永居

法拉奇喺星期一召開記者會，再次詳細講解佢嘅移民政策大計，明言改革黨如果上台，將會取消現行「居英滿5年就有資格申請永居」嘅制度，改為「每5年要續簽一次工作簽證」。新簽證唔單止要符合更高收入門檻，仲要通過更嚴格嘅英語水平測試，福利亦會受限。換言之，即使已經有幾十萬移民喺英國生活，包括BNO港人，全部都唔會再享有永久居留嘅保障。

法拉奇直言，措施針對嘅係由明年至2030年間，預計有80萬人將會合資格攞到永居，佢形容呢批大部分都係「年輕同低技術移民」，會大量耗用英國社會福利，令英國背負沉重財政壓力。佢聲稱政策一旦落實，政府將可慳返2,340億英鎊公帑，仲狠批現時納稅人「被逼資助移民」，話「英國唔應該成為世界嘅食物銀行」。

當記者追問呢個新政會唔會直接影響依靠政府計劃移居英國嘅烏克蘭人同香港人時，法拉奇重申：「無一個可以攞到。」英國《衛報》記者更加即場挑戰佢，問到：「有好多移民已經透過永居制度喺度生活咗十幾年，仲組織咗家庭，子女仲係英籍。你是否準備拆散呢啲家庭，趕走佢哋？」法拉奇回應得更斬釘截鐵：「有80萬人即將合資格攞永居，我今日要講清楚，未來數年，無一個人攞到。」

改革黨聲勢上升　民調已拋離工黨

目前改革黨喺英國國會650個議席入面只得5席，但支持率節節上升，根據最新民調，改革黨已經有28%支持度，比執政工黨高出8個百分點。下屆大選預料會喺2029年舉行。

按照改革黨建議，未來將以「五年期工作簽證」完全取代永久居留制度。申請人除咗要通過英語測試，仲要達到更高薪金門檻，並且禁止領取福利。雖然具體數字未公布，但《泰晤士報》引述消息話，料將年薪門檻定喺約6萬英鎊（約63萬港元），遠高於現時技術工作簽證嘅4.17萬英鎊（約43.7萬港元）。至於入籍要求，亦會由現時平均6年，延長至7年。

改革黨嘅提議隨即引起執政工黨、在野保守黨以及自由民主黨齊聲反駁。工黨財相李韻晴狠批法拉奇嘅方案毫無根據，亦完全無法量化會拆散幾多家庭，造成幾大社會代價。保守黨方面就指出，政策既不切實際，又會打擊英國國際形象。

翻查資料，2020年7月，時任保守黨政府提出「BNO港人簽證計劃」，2021年1月正式推出，容許持BNO嘅香港人申請赴英居留。到咗2024年7月，工黨上台後，喺2025年5月建議把永久居留嘅標準年期，由「5+1」延長至「10+1」，即係要住滿10年先有資格申請，仲未清楚會唔會涵蓋BNO簽證，現任工黨政府表示正進行諮詢。