美國總統特朗普18日接受Fox新聞訪問時表示，美國會喺俄羅斯同烏克蘭戰爭結束之後出手協助「確保和平」，並再次澄清早前有關”help by air”嘅講法，強調係指戰後安全保障，而唔係即時軍事介入。與此同時，斯洛伐克同匈牙利表示，唔會因特朗普施壓而減少入口俄羅斯石油天然氣。

特朗普喺9月18日播出嘅《The Story with Martha MacCallum》節目入面話：「當我講“help by air”，我講緊嘅係戰爭結束之後，點樣協助保障安全。到最後，呢件事會發生。」

早喺8月18日，特朗普已經講過，美方願意向烏克蘭提供安全協助，「尤其可能係空中支援」，作為同俄羅斯達成和平協議嘅一部分。但特朗普今次澄清，重點喺「戰後」安排。佢同時直言，對於俄烏戰爭遲遲未能解決感到沮喪，亦對俄羅斯總統普京感到失望。佢仲形容烏克蘭總統澤連斯基同普京之間嘅關係「非常惡劣」。特朗普話：「原本我以為最容易解決嘅，就係俄烏衝突，因為我同普京關係唔錯。但結果令我失望。」

特朗普亦將矛頭指向歐洲，認為佢哋過度依賴俄羅斯石油，削弱咗結束戰爭嘅努力。佢話：「我對歐盟，或者話北約，感到唔滿意，因為佢哋仲喺度買俄羅斯石油。只要油價跌，或者俄羅斯賣唔出油，佢哋冇得揀，只能同意和談。但當歐盟同北約國家仲買緊俄油，就冇可能。」特朗普仲放話，如果歐盟對中國呢個俄油最大買家出手，透過制裁或者關稅，「戰爭可能就會完結」。佢補充：「如果歐洲對中國採取行動，我相信中國會迫使俄羅斯結束戰爭。」

歐盟方面近期回應特朗普壓力，提出加快淘汰俄羅斯能源，比原定時間更早停止入口。歐盟委員會主席馮德萊恩（Ursula von der Leyen）早前表示，布魯塞爾正考慮喺2027年前就提早停止使用俄羅斯化石燃料，作為新一輪制裁莫斯科嘅一部分。特朗普政府亦正遊說其他G7成員，對中國同印度——俄油最大買家——徵收50%至100%關稅，以加大壓力，逼普京走上談判枱。

不過，據《彭博》9月17日報導，斯洛伐克同匈牙利表示，唔會因特朗普施壓而減少入口俄羅斯石油天然氣。匈牙利同斯洛伐克係最後兩個仍透過「友誼管道」（Druzhba Pipeline）入口俄油嘅歐盟成員國。匈牙利總理歐爾班（Viktor Orban）同斯洛伐克總理菲佐（Robert Fico）一直係最強烈反對削減俄羅斯能源入口嘅歐盟領袖。

斯洛伐克經濟部長Denisa Sakova表示：「如果冇適當條件，我哋就冇辦法全面承諾，否則會嚴重打擊工業同經濟。」佢指出，基礎設施建設係轉用其他能源供應路線嘅關鍵。Denisa Sakova透露，佢早前喺維也納同美國能源部長會面時，已經清楚表達立場。而美方官員表示理解，並承認美國需要協助推動歐洲能源項目。佢強調：「只要有替代路線同足夠輸送能力，斯洛伐克唔介意多元化。」但佢亦警告，如果完全切斷俄油入口，對斯洛伐克風險極大，因為佢地處歐盟能源供應西端。

匈牙利就更加強硬。匈牙利內閣部長Gergely Gulyas直言：「一旦觸碰到匈牙利核心利益，好似能源購買問題，我哋一定會否決。」