《大紀元》報道，美國眾議院喺星期三（10日）以231票贊成對196票反對，通過咗2026財年嘅《國防授權法案》（NDAA），總授權金額高達8,926億美元，並大比數否決咗共和黨議員提出削減烏克蘭同台灣援助嘅修正案。

根據法案內容，美軍將獲得3.8%嘅薪酬提升，並透過加快審批程序嚟提升國防採購效率，亦會大力增加人工智能（AI）方面嘅研究投入，保持美軍技術領先地位。另外，法案亦呼應特朗普政府嘅政策，重點提升國防工業嘅產能，加快軍售同技術轉移程序。

此外，法案決定廢除1991年及2002年兩項針對伊拉克嘅《動用武力授權》（AUMF），呢項決定得到跨黨派共識，認為授權已經過時。眾議院仲通過修正案，取消五角大樓對混能及電動車嘅採購優先政策，反映特朗普政府強調傳統能源同軍備需求優先嘅立場。

呢次嘅表決結果大致按黨派劃分，除咗4名共和黨議員反對之外，其他共和黨議員全部支持，而民主黨方面就有17人支持，其他人全部投反對票，主因係共和黨將涉及跨性別問題嘅修正案放入法案，引發爭議。而參議院版本嘅NDAA法案總額為9,250億美元，比眾議院版本多出320億美元，目前仍喺參議院展開辯論，預料會喺本週稍後通過。參眾兩院需就法案差異進行協商，達成共識後再送交特朗普總統簽署。

兩黨喺跨性別議題上分歧嚴重，法案包括禁止五角大樓醫療保險（TRICARE）支付變性手術同荷爾蒙治療費用，亦維持特朗普政府嘅跨性別服役禁令，停止國防部涉及跨性別議題嘅多元化、公平同包容（DEI）培訓或活動經費，遭到民主黨強烈反對。

眾議院軍事委員會民主黨首席議員亞當．史密斯（Adam Smith）大力批評：「我哋提出嘅修正案同辯論申請，竟然一個都冇獲批。」史密斯喺聲明中更加炮轟共和黨人：「佢哋夾硬塞入好多黨派色彩濃厚嘅修正案，目的係喺右翼文化戰爭中攞分，完全無視美軍同佢哋家庭嘅真正需要。」

另一邊廂，共和黨人就對法案大表歡迎。眾議院軍事委員會主席邁克．羅傑斯（Mike Rogers）強調：「呢份授權法案可以令我哋軍隊現代化、全力支持前線部隊，仲可以重建美國嘅軍事威懾力。」

眾議院議長約翰遜（Mike Johnson）發聲明話：「法案確保我哋軍隊繼續係世界上最具殺傷力嘅部隊，有能力威懾任何潛在對手。」佢又特別提到法案將特朗普總統嘅15項行政命令納入正式法例，強調「終止五角大樓嘅覺醒（woke）意識形態、強化邊境安全、振興國防工業基礎同重塑軍隊戰士精神」，全面落實特朗普同共和黨「以實力求和平」嘅承諾。

共和黨議員瑪喬麗．泰勒．格林（Marjorie Taylor Greene）提出終止對烏克蘭嘅資金援助同取消台灣安全合作倡議嘅資金，但分別以60對372票同9對422票大比數否決。根據法案，2026財年「烏克蘭安全援助倡議」授權3億美元，「台灣安全合作倡議」嘅授權上限係10億美元。

共和黨眾議院軍事委員會成員唐．培根（Don Bacon）及邁克．特納（Mike Turner）公開反對削減對烏克蘭嘅軍事援助。培根更表示：「烏克蘭嘅勝利符合美國嘅安全利益」，警告若烏克蘭淪陷，俄羅斯將向波羅的海國家施壓，又指：「姑息普京唔係真正保守主義嘅立場。」