第十屆「一帶一路高峰論壇」今（10日）喺灣仔會展中心揭幕。中央官員出席致詞時強調，要研究推動內地、香港和澳門三地共建單一自貿區，又話中國經濟長遠向好嘅趨勢始終不變，聲稱「國家好，香港一定好」。

商務部副部長鄢東致辭時強調，商務部近年同特區政府緊密合作，全力支持香港參與共建「一帶一路」，協助香港打開內地同國際市場大門，並將繼續推動香港加強內外聯繫，包括進一步擴大內地對香港金融、建築、旅遊等多個行業嘅開放程度，仲會研究推動內地、香港同澳門三地共建單一自貿區，亦支持香港盡快加入《區域全面經濟夥伴關係協定》(RCEP)，進一步擴大香港嘅國際經貿網絡。

鄢東指出，「一帶一路」經貿合作成果豐盛，單單去年，中國同共建「一帶一路」國家嘅貨物貿易額已經突破3萬億美元，更建成大量標誌性基建同民生工程，提升咗共建國家嘅基建水平。此外，中國亦同超過50個共建國家簽署咗多方面嘅投資合作備忘錄，積極推動全球綠色低碳發展，分享數碼經濟成果。

鄢東又強調，商務部將繼續全力支持香港鞏固同提升國際金融、航運、貿易中心嘅地位，推動香港喺「一帶一路」設施聯通、貿易暢通同資金融通方面發揮重要橋樑角色，進一步擴大同共建國家嘅貿易投資規模。另外，亦支持香港積極對接更多國際項目，組織香港同內地企業走出去，利用香港法律服務、商事仲裁、金融保險等專業優勢，為國際投資及工程項目提供高質素嘅專業服務。

發改委副秘書長肖渭明喺開幕禮上表示，今年上半年，中國經濟穩步向好，成績優於預期，推動高質量發展成果顯著，強調無論外圍環境如何變化，中國經濟長遠向好嘅趨勢始終不變，並強調「國家好，香港一定好；香港好，國家會更好」，希望香港繼續為共建「一帶一路」高質量發展增添更大動力。

肖渭明指出，香港係外資進入內地同內地企業走出去嘅重要樞紐，亦係國家經濟高質量發展嘅重要戰略支撐點，發改委將繼續支持香港聯同內地企業，到東南亞、中東及中亞等共建國家開拓更多商機，積極對接國際資金同優質項目，亦會推動香港與共建國家喺文化、旅遊、藝術等領域深化交流合作，打造更多獨特吸引力嘅文化品牌。

國資委副主任李鎮則喺論壇上致辭表示，中央企業一直同香港各界保持密切聯繫，協助「一帶一路」項目融資，並聯同香港嘅專業服務機構提升國際項目嘅合作效率同風險管控能力，認為香港係中央企業走出去嘅重要橋頭堡，亦係全球資源連接中國市場嘅重要轉換器，將喺未來「一帶一路」嘅高質量發展入面扮演更加重要嘅角色。

李鎮又表示，面對全球局勢波動，挑戰前所未見，香港由治及興嘅歷史機遇千載難逢，國資委同中央企業將會繼續同香港各界加強合作，推動香港更好融入全球發展大局，充分發揮香港專業服務嘅優勢，尤其係新成立嘅國際調解院嘅角色，為各項國際合作項目提供強力嘅支援，並期望更多香港年輕人積極參與「一帶一路」嘅志願服務，憑藉香港中西文化交融嘅優勢，為未來合作建立更加穩固嘅基礎，深信香港同中央企業嘅合作潛力無限。