畢業求職季節又到咗，應屆畢業生自然最關注嘅就係搵工問題，但本港經濟差，就業市場傳出壞消息。根據大學聯校就業資料庫（JIJIS）最新統計，2025年首季（1月至3月）適合大學生嘅全職職位空缺僅錄得7,928個，按年大跌51.7%，跌幅之大令人咋舌。數字唔單止低於去年同期，甚至比疫情期間平均每季約12,000個職位空缺嘅水平更差，反映香港畢業生嘅就業壓力已經超越咗疫情時期。

六大行業職缺急挫，客戶服務類工作最受重創：

求職重災區一：客戶服務類工作包括零售、酒店及旅遊等，係今年職位空缺暴跌最誇張嘅行業，去年同期仲有4,502個空缺，而今年急跌超過九成，只剩約300個職位空缺，按年大跌92.2%，形勢嚴峻。

求職重災區二：研究及開發類 研究及開發相關工種今年亦遭遇大幅縮減，去年首季661個職位空缺，今年只剩212個，跌幅高達近68%。

求職重災區三：教育類 一直被視為相對穩定嘅教育行業，職位空缺由去年817個大減至今年301個，與去年同期比較，跌幅高達63.2%。

求職重災區四：IT/程式設計類 IT及程式設計職缺同樣受重創，去年同期2,390個職位空缺，今年只得889個，與去年同期比較，跌幅達62.8%。

求職重災區五：市場營銷及調查類 市場營銷及市場調查類相關工作，去年同期職位空缺有701個，今年首季只有315個，按年下跌55.1%。

求職重災區六：金融類 金融類行業嘅職位空缺亦明顯縮水，由去年的1,101個職缺跌至今年的524個，與去年同期比較大跌52.4%。

分析指出，本地勞動市場正經歷結構性轉變，與消費、旅遊相關工種受到沉重打擊，傳統被視為穩定嘅教育同金融行業亦難以倖免。呢個情況代表應屆畢業生要喺有限嘅職位空缺之下展開激烈競爭，求職壓力必然更大。

雖然職位空缺大幅萎縮，但今年首季大學畢業生嘅薪酬水平卻略有上升。根據統計，職位薪酬中位數達19,500元，平均薪酬為21,000元，與去年同期相比升幅約2%。專家認為，呢個情況反映企業雖然招聘人數減少，但仍願意提供較佳待遇去吸引合適嘅人才。