烏克蘭首都基輔遭俄軍狂轟猛炸，至少23人死亡，包括4名兒童，美國總統特朗普對事件表示唔高興，但又唔覺得意外。美國國務院週四（28日）宣布批准向烏克蘭出售3,350枚空射型遠程巡航導彈（Extended Range Attack Munition, ERAM）及相關裝備，總金額約8.25億美元，據悉將由歐洲國家支付相關費用。

閉路電視片段拍到周四朝早俄軍空襲基輔嗰一刻，天空出現巨大火球，過幾分鐘後，同一個位置再次被炮火擊中。烏克蘭軍方表示，俄羅斯由周三晚開始，全國性咁發射咗差唔多600架無人機同30幾支導彈，好多能源設施被打到稀巴爛，超過十萬戶停電，連英國文化協會大樓同外國使館都中招。

歐盟駐基輔嘅外交代表團辦事處亦被波及，兩支俄軍導彈在短短20秒內落喺辦事處50米外嘅地方，好彩冇人受傷。歐盟同英國即刻召見俄羅斯駐歐盟代辦馬拉揚同俄羅斯駐英大使凱林，表達強烈不滿。歐盟委員會主席馮德萊恩嚴厲譴責俄羅斯為恐嚇烏克蘭唔擇手段，仲專門襲擊平民甚至歐盟設施，並即時宣佈啟動第19輪制裁，更決定用已經凍結咗嘅俄羅斯資產幫助烏克蘭重建。

烏克蘭總統澤連斯基狠批俄羅斯選擇繼續用武力，而唔係採取任何和平行動，質疑俄方有意破壞美國總統特朗普同歐洲各國領袖斡旋俄烏停火嘅努力。

美國白宮表示特朗普總統對俄軍今次攻擊事件唔高興，但又唔覺得意外，認為俄烏兩國領袖暫時都仲未準備好停火。白宮發言人萊維特講明：「總統聽到呢個消息當然唔開心，但係佢唔覺得驚訝，因為兩國戰事已經打咗咁耐。俄軍今次襲擊基輔，但烏克蘭亦有回擊，重創咗俄羅斯嘅煉油廠。」

與此同時，美國國務院亦批准咗新一輪總值8.25億美元嘅對烏克蘭軍售，當中包括3,350枚ERAM增程導彈同GPS導航設備，仲提供相關嘅電子戰防護裝備、技術支援同配件。軍售嘅費用由丹麥、荷蘭、挪威等歐洲盟友同美國嘅對外軍事融資（Foreign Military Financing）共同承擔。

國務院聲明指出：「今次軍售有助美國實現外交政策同國家安全目標，提升合作夥伴國家嘅安全，支持烏克蘭維持歐洲地區嘅政治穩定同經濟發展。」據國務院公佈，Zone 5技術公司（Zone 5 Technologies）同科阿斯派爾公司（CoAspire）係呢批軍售武器系統嘅主要承包商。

ERAM導彈係美國空軍喺拜登政府時期專為烏克蘭研製，被媒體形容為「平價巡航導彈」。根據公開資料，導彈射程介乎240至450公里，彈頭重226公斤，飛行速度大約每小時760公里，仲有抗GPS干擾嘅導航能力，每支成本大約30萬美元，年產量可以快速提升至1,000枚。

相比德國嘅「金牛座」（Taurus）巡航導彈，ERAM導彈雖然射程同威力稍遜一籌，但勝在價錢平、容易量產，可以攻擊陸上同海上嘅目標，主打嘅策略就係「用數量贏戰場」。