《信報》今日報道，今年全國「兩會」之後，北京當局再度出招，啟動一輪名為「深入貫徹中央八項規定精神學習教育」嘅運動。受影響嘅唔止大陸官場，就連駐港中資機構近半年都要跟隊，密集開學習會議，仲要填自我檢討問卷，好似返咗去大陸單位咁。

報道指出，以往香港中資企業因應本地情況，仲有個所謂「港版八項規定」，比內地鬆手得多。但北京今次落新指示，要求駐港員工照搬內地嚴格做法，「港八條」正式玩完。換言之，以前仲有啲「香港特色」嘅空間，而家連最後嗰啲「彈性」都冇埋。

有親北京嘅建制派人物接受訪問時話，雖然香港從政要求同大陸有啲唔同，但近排建制圈都掀起「學習八項規定」風氣，強調要「反思形式主義、抵制奢靡之風」。佢哋甚至舉例話，就算搞慶典、飯局聚餐，都要「格外注意」。

所謂「八項規定」，係2012年12月4日，由中共十八屆政治局會議通過，習近平上台初期主打嘅一套黨內規矩。表面講係「精簡會議文件」、「勤儉節約」，實際上係用嚟加強紀律控制。

與此同時，港區人大代表胡曉明今日喺《香港01》發表標題為「新疆創新發展模式值得香港借鑑」的評論文章。佢表示，今年8月一班港區人大代表遠赴新疆，行程6日半，走訪咗烏魯木齊、喀什、伊犁、石河子、昌吉等多個城市，仲自誇「馬不停蹄」去咗35個視察點。

胡曉明話，今次調研主要係想了解當地歷史、文化、經濟、司法、社會同創新科技，大讚新疆顛覆咗刻板印象，比大家想像中更現代化，發展潛力龐大。佢特別舉例，新疆係中國最大棉花產地，機械化率達99%，仲用北斗導航播種、智能灌溉系統同無人機巡田，聲稱增產30%。石河子大學甚至利用基因編輯技術培育咗耐旱棉種，仲打破咗世界紀錄。

佢又話，最印象深刻嘅係新疆建立咗所謂「空-天-地一體化監測網絡」，靠大數據即時監測土壤濕度、蟲害、氣候等情況，再用手機程式遠程控制灌溉系統，大幅提升效率。佢大讚，呢套模式「值得香港學習」。佢提到，新疆正推「科技創新驅動」戰略，烏魯木齊、昌吉、石河子等地相繼成立國家級高新技術區。今年3月仲發表《新疆維吾爾自治區科技創新條例（草案）》，希望打造「科技強區」。新疆將計劃喺香港設立辦事處，促進兩地交流合作。

胡曉明表示，香港可以「優勢互補」，用香港嘅金融、專業服務配合新疆嘅產業需求，幫助新疆走向國際，反過來亦可提升香港競爭力。有分析認為，北京嘗試將香港定位成「新疆服務中心」，借用香港平台替新疆洗白，為其國際形象鋪路。