快時尚巨頭 Shein 嘅上市之路再度出現戲劇性轉折。據《彭博》引述多名知情人士透露，現時註冊喺新加坡嘅 Shein，正同律師團隊研究返中國設立母公司，目的係希望能夠正式向中國繳稅，並畀到中國監管部門更多權力去監察公司數據，以換取北京點頭，批准 Shein 赴港上市。

據悉，Shein 原本計劃喺倫敦掛牌，但因為未能獲得中國證監會放行，最終胎死腹中。消息人士指，公司高層近月已經就返中國註冊呢個方案向律師徵詢意見，但目前仍然係初步討論階段，未有定案。由於 Shein 已經錯過咗紐約同倫敦，市場普遍認為，香港現時已經成為唯一具可行性嘅上市地點。據了解，Shein 已透過「保密途徑」正式向港交所遞交上市申請，但最關鍵仲係要等中國監管機構點頭，否則根本無法推進。

雖然 Shein 總部掛名喺新加坡，但由於其供應鏈同核心業務高度依賴中國，本質上仍受制於中國監管規範。根據中國證監會規定，所有「與中國有實質性關聯」嘅公司，不論佢地係咪喺境外註冊，只要想去海外上市，都必須事先過到中證監審批。《彭博》早前仲爆料，Shein 未能成功喺倫敦掛牌，正正係因為無獲得中證監批准。

對於 Shein 考慮返中國設母公司，法律界認為有一定可行性。偉凱律師事務所合夥人杜萊恩（Ryan Tou）就指出，雖然一般上市申請遞交 A1 表格時，架構理應「基本完成」，但如果申請人喺提交之後進行公司重組，只要有合理理由同能喺上市前完成，其實唔難被接受。換言之，Shein 若真係決定改變註冊地，雖然罕見，但並非不可操作。

過去幾年，Shein 一直刻意擺脫「中國公司」標籤，力圖打造成「全球化品牌」。公司不單止將總部由南京搬去新加坡，仲大量招聘外籍高管，就連創辦人許仰天都有傳已經成為新加坡永久居民。另外，Shein 中國主要實體「南京領添資訊科技有限公司」亦早喺2021年註銷，外界普遍認為係為咗鋪路去海外上市。但現時形勢逆轉，要想赴港掛牌，Shein 或不得不重新擁抱「中國身份」。

Shein 上市計劃一直備受外界關注，不過其創辦人許仰天仍然低調得近乎傳奇。現年41歲嘅許仰天，1984年出生於山東淄博一個清貧家庭，據稱細個時成日靠饅頭撈豉油過活，高中就已經出外打工。大學時期，佢喺青島科技大學主修國際貿易，畢業後入行做 SEO（搜尋引擎最佳化），其間兩度創業做電商，產品種類繁多，從紫砂壺到眼鏡乜都有。直到2012年，許仰天將業務轉向婚紗市場，創立網站「SheInside」。

到2015年，佢將品牌簡化為「SHEIN」，同時將總部由南京搬到廣州番禺，正式紮根中國服裝供應鏈重鎮。憑住靈活供應鏈同超低成本打法，Shein 喺短短幾年間成為全球快時尚巨頭，目前市佔率接近兩成，更一度被評為全球第五大獨角獸企業。

市場人士指出，Shein 能否最終成功赴港上市，取決於北京是否肯放行。考慮到 Shein 每年龐大出口量、數據掌握同外資投資敏感性，北京政府未必會輕易拍板。現時 Shein 身處關鍵十字路口，係繼續維持「全球化」定位，抑或重新「回歸中國」以換取監管支持，將會成為其 IPO 成敗嘅關鍵因素。