廣東湛江一名19歲青年小黃，2025年2月竟然被17歲同居女友小周，以10萬元人民幣（下同）賣咗去緬甸「電詐園區」。入園之後，小黃被剃光頭、關進「小黑屋」，每日都要參與電詐，完唔成業績就會遭毒打，耳仔畀人打到聽唔到聲。直到同年6月，家人透過多方斡旋，支付35萬元贖金先救返中國。而女友小周賣咗小黃之後，仲留喺泰國玩10日。

8月17日，小黃嘅姐姐黃女士公開講述弟弟被騙去緬甸嘅詳細經過，仲將佢嘅遭遇發佈喺某平台，希望更多年輕人「以弟弟為誡」，提高警覺，避免再有人中招。黃女士表示，佢哋一家原籍湛江，喺廣州生活。弟弟小黃2025年19歲，女朋友小周2025年17歲。兩人係2024年喺台球廳識嘅，加咗微信之後開始傾計，之後就同居成為情侶。黃女士第一次見小周時，感覺佢係「精神小妹」，成日著得性感，用嘅袋同飾物好時髦，好似大牌。小周自稱係福建人，父母係幹部，「在各地都有投資」。

不過黃女士就懷疑，「她身上那些大牌，看起來像是仿品。」黃女士直言，唔明點解弟弟會咁迷戀呢個女仔，從佢接觸過嘅感覺嚟睇，小周係刻意包裝自己，實際情況未必似佢所講。佢認為弟弟嘅表現係「典型的戀愛腦」。拍拖之後，小周不斷同小黃講，自己家族喺緬甸有生意，希望小黃同佢一齊去緬甸工作。

黃女士透露，2025年2月2日，小黃瞞住家人，跟住小周去咗泰國曼谷，黃女士憶述：「他發朋友圈我們才知道他去泰國了。」佢仲喺帖文中寫道：「可是後來到了邊境就不對勁了。我弟弟說來接他的人是有槍的，並且還沒收了他的護照和手機，我弟弟求那個女生把手機給他玩，他才有機會發消息告訴家人，我們迅速報了警。」兩人去到泰緬邊境之後，小周話要去接人，就將小黃丟低走咗。之後，小黃畀持槍人員押送到緬甸「凱旋園區」。

小黃入到園區之後，被剃光頭，負責人要佢不停敲鍵盤，參與電詐。完唔到業績就要畀人關「小黑屋」，仲要遭毒打。主管直言，自己係以10萬元從小周手上買咗佢，要求佢喺園區創造業績。小黃每日要工作16至20個鐘，園區看管人隨時用鐵棍打佢腰，或者摑耳仔，伙食不足，飯食唔飽。長期折磨之下，小黃暴瘦幾十斤，膚色變得黝黑，耳仔仲畀人打到聽唔到聲。

後來因為小黃騙唔到人，園區人員話要「賠付才能回家」。家屬喺國內四圍打聽，最終喺「緬甸潮汕商會」幫助下同園區斡旋，支付咗35萬元贖金，先喺2025年6月成功將小黃帶返國內。返國之後，小黃比出國前瘦好多，皮膚亦黑晒，精神狀態明顯受創。

據了解，小周喺10萬元賣掉小黃之後，仲留喺泰國玩咗10日，返國後就畀警方控制。黃女士表示，小周涉嫌詐騙罪，正面臨檢察機關公訴。原本計劃7月底開庭嘅案件已延期一次，近期將會再審理。黃女士強調，佢哋一家希望小周受到法律嚴懲。