壹傳媒創辦人黎智英及《蘋果日報》三間公司涉及串謀勾結外國勢力案，今日喺西九龍法院正式展開結案陳詞。法庭甫開庭就先處理黎智英嘅健康問題。法官杜麗冰話，黎智英近日健康轉差，由於佢需要配戴監測心臟嘅「動態心電圖」儀器，因此決定押後到下個禮拜一（18號）再重新開庭。美國總統特朗普昨日（14號）公開表示，一定會盡力「拯救」黎智英，更表示會喺同中國國家主席習近平會面時，特別提到黎智英，仲形容黎智英係一個「好人」（good guy），但同時承認習近平應該唔會高興或者樂意放人。

結案陳詞開始前，法庭首先討論黎智英嘅身體情況。法官杜麗冰提到，黎智英喺8月7號曾經接受過資深醫護人員嘅檢查，當時建議佢配戴動態心電圖（Holter Monitor）儀器，但黎智英當時拒絕接受。辯方資深大律師彭耀鴻強調，雖然黎智英嘅身體檢查未驗出明顯問題，但的確曾經出現心跳停頓同埋心跳加速嘅情況，而家佢亦願意配戴心電圖儀同服藥，唔希望因為自己嘅健康狀況影響到聆訊進行。

杜麗冰則指出，法庭除咗要確保審訊程序順利進行之外，更加要確保黎智英嘅健康安全。控方副刑事檢控專員周天行話，現場已有懲教署醫療團隊候命，可以隨時處理突發狀況。法庭隨後宣佈暫時休庭。

休庭之後，控方再表示，經過與懲教署商量，已經安排好黎智英配戴「動態心電圖」儀器，但仲需要啲時間準備，預計下星期一聆訊前可以完成相關安排。法庭最後決定，必須等黎智英完成佩戴心電圖監測設備後，先可以繼續聆訊，今日嘅聆訊因此不足一個鐘便宣佈休庭，押後到下個禮拜一再續。

今日黎智英由三名懲教署人員陪同出庭，佢著住一件白色風褸，戴眼鏡，坐喺被告欄，期間同代表律師商量嘅時候，一度要由懲教人員扶住先站得穩。庭內公眾席同記者席座無虛席。法院外警方嚴密佈防，多架警車喺法院一帶戒備，近百名警員喺場外駐守，更出動警犬巡邏，截查來往車輛，檢查部分車輛嘅車底。

呢單案件由三位國安法指定法官杜麗冰、李素蘭及李運騰一齊審理。控方由副刑事檢控專員周天行、高級檢控官陳穎琛等人負責。黎智英嘅律師團隊就包括資深大律師彭耀鴻、大律師關文渭、持香港執業資格嘅紐西蘭御用大律師 Marc Corlett、黃雅斌、董皓哲、李峰琦及姚穎彤，而三間《蘋果日報》相關公司則由大律師王國豪代表。

特朗普昨日接受美國霍士新聞電台訪問時，主持人引述黎智英嘅仔黎崇恩，再次提到特朗普去年曾經承諾會爭取釋放黎智英一事。特朗普回應重申，佢一定會向習近平提及黎智英嘅案件，但唔敢保證一定可以成功，「我會盡一切努力去救佢（I’m going to do everything I can to save him），你知道，佢（黎智英）備受尊重、是個好人，但你也能肯定習主席唔會因作出呢件事（釋放黎智英）而好高興」」

特朗普仲話，黎智英嘅名字已經進入咗佢哋嘅討論範圍，並話：「我哋會睇下仲可以做啲咩。」特朗普又表示佢好欣賞黎崇恩：「我鍾意佢咁努力為父親爭取，佢爸爸亦都唔後生，究竟仲可以活幾耐呢？」今次已經係特朗普喺一年內第三次公開提到黎智英嘅名字，佢喺今年五月時亦表示會將黎智英列入與中國談判嘅一部分。