《明報》報道，有市民前日（11日）用內地網約車平台「高德地圖」叫網約車，竟然發現司機只識講普通話，更親口承認自己冇香港身分證，仲話架車係由「老闆」提供。涉事市民懷疑司機係非法「打黑工」，更加有集團式運作嘅嫌疑，已即刻報警求助，而警方最初則以資料不足為由表示「告唔入」。其實今次事件並非個案，上月亦有持雙程證內地男子透過高德載客取酬，被警方「放蛇」拘捕，上周三（6日）被判囚兩個月。

前日下午約兩點左右，梁先生透過AlipayHK程式連接「高德打車」，叫車由荃灣海濱花園去沙嘴道，接單嘅係服務供應商「宇宙Call車」司機「吳師傅」，駕駛一本地牌嘅白色私家車。程式顯示，「吳師傅」已完成371張單，評分有4.5分。

梁先生話，上車之後以廣東話同司機打招呼，「叫佢師傅無反應」，再追問司機係咪住喺香港，但對方繼續無反應。佢懷疑司機唔識廣東話，於是改用普通話再問，司機就承認自己冇香港身分證，係用商務簽證入境，又話：「這個平台不需香港身分證也可」，更加透露架車係向「老闆」租嚟揸嘅。梁先生追問司機冇身分證點可以開網約車，對方竟然話：「現沒有管，9月份過後應開不了。」政府早前已經表示，今年第三季會向立法會提交規管網約車嘅修例建議。

梁先生又批評涉事司機明顯唔熟香港道路，駕駛嘅時候車速偏慢，轉彎前又冇事先駛入合適行車線，擔心咁樣嘅內地司機對乘客安全構成威脅，猶如「路上計時炸彈」。佢表示以後唔會再用高德叫車。

梁先生認為高德必須要加強對司機嘅審查同監管，擔心背後有集團安排內地人非法嚟港做司機，因此即日報警。但警方初時竟然以資料不足為由表示「告唔入」，佢唯有同晚將事件分享到社交平台Threads，引起關注後，警方先至主動聯絡佢，接佢返警署落口供。梁先生事後亦透過AlipayHK平台向高德客服投訴，對方回覆話「會反饋服務商核實」及會再致電佢，但直至昨晚仍未有回覆。

據了解，「高德」而家係同本地嘅服務供應商合作，由合作嘅服務商負責招攬同管理司機。高德昨日回應傳媒查詢時，強調對違法行為採取「零容忍」嘅態度，會持續督促合作夥伴必須守法經營。運輸署就表示非常關注事件，會去信有關營運商要求交代。

有熟悉網約車業務嘅人士透露，高德平台係透過與幾間服務商合作提供網約車服務，司機由服務商招募同管理，高德角色主要係監督合作夥伴守法經營。根據資料，「宇宙Call車」、「OKGO」、「老虎出行」同「高呼叫車」呢四間服務商司機嘅App版面設計完全一樣，司機登記時必須提供香港身分證、駕駛執照、車輛保險單同埋車輛相片。

其中「宇宙Call車」司機App嘅開發商係香港莊宏宇工作室有限公司，註冊地址係一間秘書公司，董事兼股東為莊宏宇，報稱通訊地址喺北京。《明報》記者昨日曾經致電呢間秘書公司，接聽電話嘅職員操普通話，表示可以代為聯絡工作室。但當《明報》記者表明係想查詢事件後，對方即刻掛斷電話。

警方表示，前日已經收到報案，案件現已交由新界南總區交通部跟進，如果調查期間發現有人涉及其他違法行為，例如違反逗留條件，警方會適當調查，有足夠證據將會提出檢控。入境處則表示，非常關注疑似有訪客在港駕車非法收取報酬嘅情況，會密切留意相關罪案趨勢，適時採取執法行動。

運輸署回應指，政府正研究修例，日後就算未能確認司機身份，只要涉及非法出租或收取報酬嘅車輛都可以扣押。根據現時法例，首次定罪嘅話最高可判罰款一萬蚊同監禁六個月，涉案車輛亦會被吊銷牌照兼扣押六個月；再犯嘅話最高罰款二萬五千蚊及監禁一年。