一名63歲無業羅姓男子，疑因早前與超市職員起過爭執，竟然懷恨在心，過去一年間多次將自己嘅尿液加入加系可口可樂（Coca-Cola Plus）同七喜嘅膠樽裝汽水，之後擺上深水埗、旺角同灣仔區多間超級市場貨架出售。其中一次更加導致一名9歲男童飲用後感到不適，要即時求醫！事件近日曝光後，惠康同百佳即時向媒體表示，受影響嘅飲品已經緊急下架。

警方經過深入調查，翻查大量閉路電視畫面同情報分析後，喺8月9日鎖定羅姓疑犯，並且喺佢位於深水埗嘅住所將佢拘捕，現已暫控佢一項「意圖損害等而施用毒藥等」罪，案件今日（12日）喺九龍城裁判法院提堂。

消息人士透露，羅男並唔係喺超級市場即場「加料」，而係疑似自己平時有飲用汽水習慣，之後利用空樽加入尿液，再扭返好樽蓋，然後偷偷摸摸放返超級市場貨架，行為持續大約一年時間。警方除咗起出疑犯犯案時穿著嘅衣物外，仲喺羅男住所搜獲1支已準備好嘅尿液，及約6支未開封、與驗出有尿液屬同一批次嘅飲品，相信疑犯原本仲準備繼續犯案。

警方表示，事件首次曝光，除咗因為有9歲男童飲後出現不適外，原來超級市場職員早於去年9月起已經發現部分飲品有異樣，但當時未知成份，直至男童飲用後通報食環署，先至揭發竟然係尿液。警方強調今次案件性質極其嚴重，唔單止係嚴重威脅公眾健康，更加係打擊市民對食品安全嘅信心，呼籲市民喺購買扭蓋式汽水飲品時，要特別注意樽蓋有冇被打開過嘅痕跡，又或者膠樽飲品如果被打開後擺放一段時間，樽身會變軟，另外亦可以觀察容器內嘅液體容量、顏色有冇出現異常。

香港太古可口可樂公司回覆媒體查詢時表示，一向以產品安全同質素為首要考慮，今次事件係本港市場罕見嘅個別蓄意污染事件，涉案嘅係加系可口可樂500毫升膠樽裝產品，公司已經全程配合政府調查，並感謝當局以高度專業態度處理事件。

食品創新科技中心項目總監方麗影今日接受電台訪問時解釋，正常人嘅尿液主要成份係水、尿酸同多餘嘅電解質或代謝物，但患病人士嘅尿液中可能含有病毒或藥物殘餘，誤飲會對人體造成污染。佢建議如果誤飲含尿液嘅飲品，應盡快飲用至少1公升清水，盡量將污染物排出體外。方麗影批評今次事件係「噁心同不道德」，並提醒消費者如果發現扭蓋飲品嘅蓋鬆鬆地或者冇「啪一聲」，就千祈唔好再飲。

另外，大律師李健志喺同一節目指出，疑犯將尿液加入汽水再擺上超市貨架出售，已經觸犯香港法例第212章《侵害人身罪條例》第23條「意圖損害等而施用毒藥」罪，如果疑犯重複犯案，刑期更可能超過3年，甚至有機會被移交更高級法院審理。李健志又指，受害顧客亦可考慮向犯案者及超級市場索償，原因係超級市場喺銷售過程中未能做到嚴格把關。