香港昔日被譽為「購物天堂」，但近年光環明顯褪色。繼早前有內地網民喺小紅書形容香港係「國際金融中心遺址」之後，近日再有上海旅客用「購物天堂廢墟」去形容香港，直斥喺港購物「還不如拼多多」，更話「晚飯都沒吃就溜了」。事件迅速喺內地旅遊圈掀起討論，反映本港零售業唔止復甦無期，形象仲可能喺部分旅客心目中持續惡化。

專程嚟港搵相機兼掃貨　結果空手而回

根據該名旅客喺小紅書嘅內容，佢係來自上海嘅李先生，早前專程飛嚟香港「尋寶」，想搵老款數碼「CCD 相機」同菲林相機，順便買任天堂 Donkey Kong Bananza 遊戲機帶返去。佢先後到過幾間熱門相機舖睇二手貨，包括星際城市、福華相機、情迷相機，但結果大失所望——首先，舖頭賣嘅「CCD 相機」比內地二手交易 App「閑魚」仲貴；其次，信和中心嘅 Switch 遊戲機帶比拼多多仲貴 50 蚊。

據李先生所講，佢同其中一間舖嘅老闆傾起網購價錢更平時，對方仲要訴苦，話「拼多多正在割實體店」。之後佢再去睇黃金價錢，發現深圳水貝更加抵，最後乜都冇買就離開。李先生最終淨係買咗幾隻二手 CD、美心減價月餅同一部 Pentax17，就離開香港，晚上決定返「價廉物美」嘅深圳食晚飯。佢感慨：「是有些唏噓的，碼僅是金融中心遺址，也是購物天堂廢墟，現在逛商場只逛不買了」。

內地客：想不到任何理由去香港 有人話不如飛東京

「購物天堂廢墟」呢個講法引起唔少內地旅客討論。有浙江旅客直言：「想不到任何理由去香港」，如果要線下購物，會「選擇飛東京」。有網民指出，李先生買嘅王菲 CD，喺廣州會仲平；亦有人感慨香港物價太高，話「那邊的人都去深圳買，你來個反向操作」。不過，都有人反駁李先生，話 lululemon 嘅貨喺香港買會平啲，仲有啲產品喺內地從來唔打折，但香港就會半價推售，「香港在折扣度大的時候都能跟日本拼一下」。

咁「購物天堂廢墟」係咪真嘅？九倉置業嘅分析數據顯示，2023 年第一季至 2025 年第二季嘅 10 個季度入面，餐飲收入只係「相對窄幅的上落」，而零售表現仲比餐飲差，要話零售業已經好轉，似乎有難度。唔少內地旅客覺得香港比日本仲貴，主因係滙率——人民幣兌港元「接近一比一的滙率根本沒優勢」。

資料顯示，由去年底開始，市場已經出現人民幣兌港元幾時去到 1：1 嘅討論，分析認為如果人民幣進一步大幅貶值，會對港元同香港經濟構成壓力。翻查資料，2013 年時人民幣兌港元係 1.28，而家只剩 1.09，購買力確實持續下行；相反，人民幣兌日元由 2019 年約 15.51 升到而家 20.44，喺日本嘅購買力反而上升。因此，內地旅客覺得「直飛東京」更抵，就唔難理解。滙率趨勢如果冇變，「香港物價貴」嘅印象短期內都難以改變，「購物天堂」嘅稱號恐怕會愈來愈遙遠。