美國總統特朗普宣布，由8月1日起，將對印度輸美貨品徵收25%關稅，仲話會因應印度從俄羅斯購買能源嘅行為實施懲罰措施。特朗普指出，雖然印度係美國嘅朋友，但長期以嚟美印之間嘅貿易規模偏低，主因係印度自身嘅關稅政策太高，仲有全世界最難搞嘅非關稅貿易壁壘。特朗普更加批評話，各國正努力阻止俄羅斯喺烏克蘭屠殺平民，但印度偏偏長期向俄羅斯大量採購軍備，仲同中國一樣，係俄羅斯能源嘅主要買家，「呢啲全部都唔係好事！」佢話由8月1日起，印度貨品將要承受25%嘅關稅，仲加埋其他懲罰措施，強調美國同印度之間嘅巨額貿易逆差需要盡快處理。

另一方面，特朗普亦宣布對韓國產品徵收15%關稅，較之前威脅嘅25%為低。南韓總統李在明發文，確認韓美經貿談判已經達成協議。李在明表示，協議之中將成立一個規模高達3500億美元嘅合作基金，呢個基金會鞏固韓美兩國戰略產業嘅合作基礎，協助南韓企業進軍美國嘅造船、半導體、二次電池、生物科技同能源市場，其中1500億美元專門用於造船業合作，將為韓國企業提供強力嘅後盾。

南韓總統府政策室長金容範今日舉行記者會，指南韓汽車輸美嘅關稅亦會同樣下調至15%。因此，南韓喺半導體同藥品出口方面，將唔會再處於競爭劣勢。金容範承認，美國喺磋商過程中曾強烈要求南韓開放農畜產品市場，但考慮到糧食安全同農業敏感度，雙方達成共識，南韓唔會再進一步開放大米同牛肉市場。至於雙方成立嘅3500億美元基金，金容範強調，當中1500億美元用於造船產業合作，另外2000億美元則用於南韓企業喺半導體、核電、二次電池、生物科技等領域嘅對美投資。

除咗印度同南韓，特朗普亦簽署行政命令，正式宣布向巴西進口產品徵收高達50%關稅。不過，當中約700種商品，包括橙汁、飛機、鐵礦石、燃料同化肥等等，就會獲得豁免，不用承受額外40%嘅懲罰性關稅。至於肉類、水果同咖啡雖然唔在豁免名單內，但商務部長盧特尼克就透露，正考慮對美國本土冇生產嘅咖啡、芒果、菠蘿同可可等食品實施零關稅。

白宮聲明指出，對巴西嘅新關稅旨在應對巴西政府最近嘅政策同行動，認為呢啲行為對美國國家安全、外交政策同經濟造成「異常威脅」。白宮強調，巴西政府以政治動機迫害、恐嚇、騷擾同審查前總統博索納羅同佢嘅支持者，嚴重侵犯人權同破壞法治，令美國有必要採取行動。

另外，據《CNBC》星期三（30日）報導，美國財政部長貝森特喺特朗普設定嘅8月1日關稅期限之前，向美國商界表示，即使關稅短期回升到較高水平幾日甚至幾個星期，都唔係「世界末日」。貝森特呼籲商界保持冷靜，表示只要各國持續推動誠意談判，相信呢啲恢復性關稅只會係短期嘅措施。