泰柬邊境停火協議嘅墨水都未乾透，和平嘅期望就即刻被再次響起嘅炮聲粉碎。《路透社》報道，就喺泰國同柬埔寨兩國領袖喺馬來西亞簽訂停火協議、午夜生效後唔夠幾個鐘，泰國軍方今日（29日）就指責柬埔寨部隊喺停火後再次發動多次攻擊，明顯違反協議內容。

根據喺馬來西亞簽署嘅協議，雙方原定29日早上7點舉行軍事談判，為呢場已經持續咗5日嘅邊境衝突降溫。不過，泰國皇家陸軍副發言人蘇克蘇瓦農上校就指責柬埔寨軍隊喺協議生效後不久，於清晨向泰方多個地點發動攻擊，泰國方面已經作出「適當比例嘅自衛反擊」。

儘管停火協議一開波就出現波折，蘇克蘇瓦農上校仍然確認，雙方嘅談判仍繼續進行中，兩國軍事指揮官於當地時間上午10點（香港時間同日早上11點）進行會晤，試圖挽救呢個脆弱嘅和平局面。

呢次泰柬之間嘅邊境衝突，被認為係過去10年嚟最嚴重嘅一次，持續5日嘅激烈戰鬥已經導致超過30萬平民被迫逃離家園，邊境城市幾乎完全變成空城，人道危機情況嚴峻。今次衝突嘅直接導火線，係喺一星期內泰國士兵兩次踩中地雷受傷致殘嘅事件。泰國政府指控地雷係柬埔寨軍方近期埋設，隨即召回駐柬埔寨大使並驅逐柬埔寨駐泰大使。柬埔寨方面就否認呢啲指控，並採取對等措施，雙方外交關係立即跌至冰點，隨後迅速引發軍事衝突。

此外，柬埔寨前總理洪森嘅親信、將軍沙萊德於28日深夜11點13分喺邊境衝突中喪生。泰國媒體《Thai Post》同《Spring News》引述泰國皇家陸軍第2軍區消息證實，柬埔寨陸軍副總司令沙萊德，當時擔任柬軍第3支援師指揮官，喺28日晚間嘅戰鬥中陣亡。沙萊德係洪森多年嘅親密盟友，曾經同洪森並肩作戰多年。

報道指出，沙萊德生前多次代表柬埔寨軍方與泰國軍方商討邊境問題。今年6月8日，佢曾經與泰國「素羅娜麗特遣部隊」指揮官會晤，交涉「翡翠三角區（Chong Bok）」嘅邊界爭議。最終，柬方同意掩埋相關壕溝，並將軍隊撤回柬埔寨境內。