有「天下第一名剎」之稱嘅少林寺近日爆出驚天醜聞，現任方丈釋永信日前突被內地多個執法部門帶走調查。少林寺官方喺7月27日（星期日）晚正式發出通報，證實釋永信涉嫌刑事犯罪，包括挪用同侵吞寺廟嘅項目資金同資產；更嚴重違反佛教戒律，長期同多名女性有不正當關係，甚至育有私生子，目前正接受多部門聯合調查。

根據《財新網》報導，釋永信早喺今年春節前後已經被限制出境，直至7月25日深夜突然被帶走調查。翌日事件即迅速傳開，引發坊間高度關注。其實早在2015年，釋永信就曾經被網名「釋正義」嘅人士舉報私生活混亂，當時掀起巨大風波。指控稱釋永信擁有兩個戶籍、兩個身份證，更指佢與河南省佛教協會副會長兼省政協委員、少林慈幼院院長釋延潔保持不正當關係，並喺2009年育有私生女韓佳恩，當事人釋延潔一直聲稱自己係受害者。此外，網絡上更流傳釋永信喺美國同德國等地擁有巨額資產，部分傳言雖然證實係捏造，但多年來關於釋永信嘅負面新聞始終未有停止。

《財新網》報導指出，十年前嘅舉報人曾赴北京向最高檢察院、中國佛教協會及國家宗教局呈交材料，指控釋永信涉及敲詐、挪用善款、私生活混亂等「十宗罪」，最終調查組澄清事件乃有人惡意炒作，釋永信因此安然過關。

釋永信俗名劉應成，1965年喺安徽阜陽出生，八歲入少林寺修行佛法及武藝。當時少林寺荒廢破敗，只靠少數耕地維生。1982年李連杰主演電影《少林寺》風靡全國，釋永信借助呢股熱潮，帶領少林武僧團巡迴全球，包括德國、日本、英國等地，成功將少林功夫推向國際舞台，並完成資本原始積累。

踏入1990年代後期，釋永信加速將少林寺商業化，除咗建立官方網站，更於1998年成立少林寺實業發展有限公司，業務涵蓋文化、出版、醫藥、食品同電子商務等領域，將少林寺IP發揮至極致。當中少林相關產品如寶劍、武功秘笈、高僧開光商品皆明碼標價，每年門票收入更高達兩億人民幣。

伴隨商業化嘅巨大成功，釋永信嘅私生活同奢華作風亦不斷引發輿論爭議。佢被指常坐豪車出入，袈裟同佛珠價值不菲，更屢傳有私生子、情人同海外資產，儘管官方多番澄清，但「花和尚、大商人」形象早已深入人心。

「少林寺上市」亦一直係外界關注焦點。2009年香港中旅與登封市合作籌備嵩山景區上市，卻遭到少林寺強烈反對，寺方聲稱事先毫不知情，更公開批評此舉違反佛教精神。

作為少林寺改革推手，釋永信推動全球化宣傳同寺院修繕工程，令少林寺名聲更上一層樓，但過度商業化亦備受批評。美國《探索頻道》甚至曾為佢拍攝紀錄片《新少林方丈》，並將「方丈」一詞譯作「CEO」。釋永信本人就回應指，少林寺需要適度商業化，否則無法維持運作同傳承。

事隔十年，年過六旬嘅釋永信再度陷入危機。內地今次官方直接介入調查，性質同規模較以往大幅升級，事件背後涉及少林寺龐大利益歸屬問題。多年來少林寺與當地政府就收取門票、寺院管理權同商標權等問題不斷爭拗，2023年開業嘅五星級「中州國際少林大飯店」更再度引發新一輪矛盾。此次調查，除咗再次曝光性醜聞之外，更可能涉及寺院資產嘅重新分配，影響深遠，內地當局未來嘅處理方式將成為焦點所在。