孟加拉空軍一架中國製造嘅F-7 BGI訓練戰機，星期二（21日）下午喺首都達卡北部Uttara區墜毀，擊中一間學校，現場即時爆炸起火，至少造成包括飛行員在內嘅20人死亡，逾百人受傷。事發學校Milestone School and College係當地著名學府，當時大批學生正喺課室內上堂或考試，災難突如其來，現場一片混亂。

軍方初步調查認為事故可能涉及「技術故障」，指事發時戰機出現機械問題，失控撞落學校建築物，飛行員雖已極力嘗試轉向避開人口稠密地區，但最後仍不幸撞毀校園，自己亦因此犧牲。當地醫院燒傷部主管薩卡醫生（Bidhan Sarker）透露，有一名三年級學生送抵醫院時已經證實不治，另一間醫院National Institute of Burn and Plastic Surgery亦接收超過50名傷者。

美國CNN引述軍方表示，涉事軍機下午1點18分左右失控，直接撞向一座兩層高嘅學校建築，BBC嘅現場畫面亦顯示，校園撞擊後火光沖天，黑煙瀰漫，建築物結構嚴重損毀，大量學生受困現場。孟加拉臨時政府即時宣布星期二為全國哀悼日，全國降半旗致哀，臨時政府領袖尤努斯（Yunus）承諾，會徹查事件起因並提供各種必要援助。

當時喺學校外有好多家長同親友趕到現場，有人更情急之下用三輪車載送傷者去醫院，現場有家長激動哭喊要求入校尋找失蹤子女，但即場被警方阻止。有流傳嘅現場圖片更令人心痛，顯示有學生疑似未能及時逃離課室而被燒死。

據印度媒體《每日覺醒報》（Daily Jagran）報道，肇事嘅F-7 BGI戰機由中國成都飛機工業集團製造，係殲-7系列中最新、性能最先進嘅型號，孟加拉喺2011至2013年間共購入16架。

翻查資料，該款中國製軍機近年來多次出事，安全記錄備受質疑，包括2012年廣東汕頭墜機導致多人受傷，2013年同2019年巴基斯坦空軍事故、2015年及2018年尼日利亞墜機、2018年緬甸空軍連續兩宗致命事故，以及2022年中國空軍湖北襄陽墜機事件，事故頻率及嚴重程度惹人關注。

孟加拉目前由臨時政府主政，前總理哈西娜去年遭民眾推翻下台，政局動蕩未穩。今次嚴重事故再次引發民眾對軍備安全問題嘅關注，臨時政府首席顧問尤努斯表示，當局將會迅速查清事件原因，防止類似悲劇再次發生。