《華爾街日報》引述消息人士報道，富國銀行（Wells Fargo）一名專責美國貿易融資嘅銀行家，最近喺中國境內被禁止出境，富國銀行現時已經即時暫停所有前往中國嘅商務差旅。與此同時，喺中國嘅美國企業今年新投資計畫創下歷史新低。

《華爾街日報》報道指出，被禁止離境嘅富國銀行董事總經理毛晨月（Chenyue Mao，音譯），係上海出生，平日主要喺美國亞特蘭大工作。她最近幾星期抵達中國之後，被中國當局禁止出境。目前毛晨月公司嘅電子郵件自動回覆指示，她正喺海外因公務出差。富國銀行喺一份聲明中表示，公司正密切留意事件發展，並通過適當渠道，積極協助員工盡快返回美國。《華爾街日報》就事件向中國外交部尋求回應，但暫未獲答覆。

毛晨月今年6月喺巴西里約熱內盧出席一個行業會議，但目前仲未知她前往中國嘅原因、入境嘅確切時間，以及被禁止離境嘅原因。毛晨月仲係國際應收帳款承購商聯盟（Factors Chain International）主席，大約兩星期前，她仍活躍喺職場社交平台LinkedIn，當時仲收到恭賀她當選國際應收帳款承購商聯盟主席嘅訊息。

另一方面，綜合德國之聲中文網等外國傳媒今日嘅消息，美中貿易全國委員會日前發表報告顯示，今年美國企業喺中國嘅新投資計劃已跌至歷史新低。該份報告嘅調查時間為今年3至5月期間，正值美中兩國關稅及非關稅衝突期間，參與調查嘅包括130間喺中國有投資嘅美國企業。

美中貿易全國委員會（USCBC）會長譚森（Sean Stein）指出：「而家喺中國嘅企業盈利能力比幾年前明顯下降，但聲譽、監管同政治風險卻不斷增加。」美中貿易全國委員會商業諮詢部門主管蘇利文（Kyle Sullivan）亦表示，超過一半受訪企業今年完全無新投資計劃，呢個現象係過去調查從未出現過嘅新發展。

報告指出，雖然有82%嘅美國企業去年仍然賺錢，但只有不足一半嘅企業對未來喺中國嘅投資感到樂觀，反映出企業對關稅、通縮以及政策不確定性嘅憂慮。此外，有27%受訪企業計劃將業務撤出中國，比例高過去年度嘅19%，仲創下有紀錄以來嘅新高。不過，幾乎所有受訪企業都表示，一旦失去喺中國嘅業務，公司將難以喺全球市場維持競爭力。

中國經濟疲弱亦係美國企業面對嘅主要挑戰。調查結果顯示，中國內需低迷、本土產業產能過剩已經嚴重影響美國企業嘅盈利能力。以往產能過剩嘅問題主要集中喺鋼鐵等工業領域，而家問題已經擴散至醫療保健同消費品等更廣泛嘅行業。81%嘅受訪企業表示，產能過剩問題令行業內價格明顯下跌。