內地樓市最新數據出爐，情況持續低迷。根據國家統計局今朝（15日）公佈，內地70個大中城市6月份嘅新建商品住宅價格，按月跌0.3%，按年跌3.2%。一線城市同樣慘淡，呈現「一升三跌」嘅格局，當中只有上海樓價有少少升幅，北京、廣州、深圳三大城市樓價繼續插水，而且已經係連續19個月負增長，顯示市場氣氛持續疲弱。

睇返詳細數字，一線城市新樓價格按年整體跌1.4%，但跌幅比起5月略為收窄0.3個百分點。不過，如果逐個城市嚟睇，就見到情況依然嚴峻：上海嘅新樓價格逆市上升6%，但北京就跌4.1%，廣州跌5.1%，深圳跌2.5%。二、三線城市方面亦都唔見起色，二線城市樓價按年跌3.0%，三線城市跌幅更達4.6%，雖然跌幅比5月收窄少少，但整體情況未見根本好轉。

至於中古樓市場，整體跌勢甚至更為明顯。一線城市中古樓價按年下跌3.0%，跌幅比5月擴大0.3個百分點。細分數字方面，北京中古樓價按年跌1.8%，上海跌1.3%，廣州跌幅更達5.9%，深圳亦跌咗2.8%。二、三線城市嘅中古樓情況亦差唔多，二線中古樓價跌5.8%，三線中古樓價跌幅更達6.7%，反映整體樓市情緒依然疲弱。

國家統計局副局長盛來運今朝喺國務院新聞辦記者會上強調，今年以嚟中央已經多次指示各地要因城施策，希望可以穩住樓市，而家數據顯示整體市場正朝著「止跌回穩」方向發展。盛來運解釋話，近期新樓銷售價跌幅稍為收窄、房企融資環境開始改善、房企債務問題逐步解決，加上樓市庫存已經連續四個月減少，認為而家樓市價格同銷售面積持續下跌屬於「築底轉型」嘅正常現象。

雖然官方樂觀，但房地產公司嘅財政報告卻相當難睇。尋晚（14日），內地龍頭房企萬科就公布咗2025年上半年嘅業績預告，預計淨虧損竟然高達100億至120億人民幣，較去年同期進一步擴大。萬科透露，上半年公司銷售收入雖然有691億元，交樓數目超過4.5萬套，回款率仲超過100%，但扣除非經常性損益後，實際虧損擴大至95億至115億之間。

萬科坦承，業務情況仍然極度困難，主因係結算規模大幅減少、毛利率長期低迷，加上資產減值、大宗交易虧損等問題困擾。公司現時只能靠住大股東深圳地鐵集團（深鐵）反覆「輸血」提供資金，先至可以勉強維持現金流同債務還款能力。今年以嚟，深鐵已經向萬科提供咗超過218億嘅貸款，同時仲要用旗下核心資產「萬物雲」嘅股權作為抵押。雖然萬科強調去到2027年之前，公司境外公開債務並無到期，但實際財政壓力仍然難以紓緩，公司話會透過「戰略聚焦」同埋「經營提振」等方法繼續自救。

但萬科並唔係唯一陷入困境嘅大型房企，內地多家知名房企亦都集體發出預警，預示樓市危機已經全面爆發。例如華僑城A，2025年上半年預計淨虧損23億至29億元人民幣，虧損較去年同期急增超過117%至174%；北京市國資委控制嘅首開股份，上半年亦預計虧損16億至21億元；天津市國資委旗下嘅津投城開預計虧損5億至6億元；上海市國資委控制嘅綠地控股，上半年更加預計會錄得30億至35億元嘅大幅虧損。呢啲全都係地方國資委旗下大型房企，佢哋嘅業績表現反映樓市衰退已經全面蔓延，國資背景亦都無法倖免。