據西班牙阿貝賽報星期日（13日）報道，烏克蘭戰況正出現前所未有嘅轉變，而今次有一宗突破性事件——完全由無人機隊與機械人地面平台主導嘅作戰行動，首次令俄軍人員無需人類步兵干預即被俘，甚至押送囚犯嘅責任，都由無人系統自行完成，烏克蘭人都無踏足前線。

7 月 9 日，烏克蘭第 3 獨立突擊旅喺 Telegram 發文，表示喺哈爾科夫（Kharkiv）地區，首次成功只靠無人機加上自殺式地面平台，逼使一批俄軍士兵向機械裝備低頭投降。通告話：「歷史性一刻，俄軍士兵首度喺由純機械人系統主導嘅攻勢下投降。」嗰支「機械人部隊」布署咗炸藥地面車，向俄軍固守陣地發動攻擊。佢哋先後破壞咗幾個掩體後，有部份地面機械人逼近一個部份塌陷嘅防護所，前線嘅俄軍為免爆炸傷害，最終選擇投降。

第 3 獨立突擊旅進一步指出：「當另一架機械人逼近嗰個被摧毀嘅掩體，敵人為免爆炸主動交出武裝，宣布投降。」值得一提，呢班被困嘅俄軍士兵之後，就喺多旋翼無人機押送之下，直送到烏軍防線，根據軍事規範，正式收押為戰俘。

有智庫分析指出，雖則烏克蘭早已廣泛運用無人艇同低成本 FPV 無人機，但今次行動表徵住戰爭科技化進程已升級至更高層次。智庫話：「機械人主導下嘅俘獲行動，大大強化咗烏克蘭嘅非對稱戰略，依靠機械人就可以減少傷亡，唔駛一槍一彈，就迫使敵人撤退。」

與此同時，俄羅斯外長拉夫羅夫（Sergey Lavrov ）正喺平壤展開為期三日嘅訪問。北韓官媒星期日（13 日）報道，金正恩公開對拉夫羅夫講：「平壤準備無條件支持莫斯科一切為解決烏克蘭衝突而採取嘅行動。」韓聯社亦引述南韓軍方話，北韓持續供應俄羅斯炮彈；如果以 152 毫米口徑計，供應量大概等同 1,200 萬枚炮彈。

路透社報道亦指出，北韓除提供炮彈之外，亦承諾會提供更多軍事支援，幫助俄羅斯向前線推進戰事。南韓國防部屬下嘅國防情報本部喺 7 月 13 號提交予國會嘅報告指，近年北韓向俄國運送嘅包括超過 28,000 個運輸箱，以估算計算彈藥總量達到大約 1,200 萬枚炮彈。自 2022 年 2 月俄羅斯入侵烏克蘭之後，北韓不但提供炮彈、飛彈、榴彈炮，甚至派遣軍隊協助作戰。烏克蘭軍方曾估算，北韓派去俄方參戰嘅官兵超過 1.4 萬人，而平壤今年 4 月首次正式承認派兵支援一事。

早喺去年，北韓同俄羅斯已簽咗一份包含「共同防禦條款」嘅軍事合作協議。金正恩喺北韓東部海濱城市元山會見拉夫羅夫，承諾會喺呢份協議架構下持續深化雙方合作。俄朝外長亦正喺當地進行第二次戰略對話議程。北韓中央通訊社指出，金正恩向拉夫羅夫重申，北韓準備「無條件支持同鼓勵」俄方領導層嘅一切措施，以解決烏克蘭危機源頭。