AI界年初曾經熱炒嘅中國新星「深度求索（DeepSeek）」，而家陷入前所未有低潮。呢間原本標榜「低成本訓練出超強AI模型」嘅公司，年初一度喺中國社交平台掀起熱潮，用戶使用率高達50%，但最新數據顯示已經跌至得番3%，接近絕跡。原定5月推出嘅新一代語言模型R2，至今毫無影蹤。

據中國科技媒體《快科技》報道，當初DeepSeek推出R1模型時聲勢浩大，打正旗號要打破OpenAI壟斷。佢哋標榜用較低成本亦可訓練出接近ChatGPT水平嘅語言模型，一度成為國產AI之光。但短短數月後，用戶卻大幅流失，使用率如斷崖式下滑，由50%瀉到剩低3%，堪稱AI界嘅「暴雷代表作」。

消息指，原定喺5月推出嘅DeepSeek-R2模型，一直冇下文。有業界人士直言，DeepSeek-R2背後面對兩大致命難題。首先，R1模型係建基於全球經過認證、質素較高嘅訓練數據，大量參考自OpenAI等國際模型嘅訓練輸出；但R2則需要更多更高質素數據，而中國本地數據質量參差，甚至不足以支撐高階模型訓練。結果出現所謂「幻覺體驗」問題，即AI亂作答案、虛構資料，嚴重影響可靠性。

第二個難題係硬件資源不足，尤其係高階GPU（繪圖處理器）嚴重短缺，直接拖慢訓練效率。中國科技圈近年受制美國出口管制，相關AI晶片如NVIDIA A100等難以取得，令DeepSeek陷入「有模型但無力訓練」嘅尷尬處境。

而與此同時，DeepSeek最大嘅海外對手OpenAI同Google旗下嘅Gemini則不斷向前衝。據《金融投資報》報道，ChatGPT網站流量今年激增40.6%，Gemini更暴漲85.8%。反觀DeepSeek仍用住半年前技術，自然無法滿足市場日益提高嘅期望。用戶由試用轉向流失，使用率急跌已成必然結果。

OpenAI曾公開指控DeepSeek非法使用ChatGPT等模型之輸出內容，用所謂「蒸餾（distillation）」技術進行模型複製。所謂「蒸餾」係AI界普遍用嚟壓縮模型體積、提升效能嘅訓練手法，即用大型模型嘅答案，去訓練細啲但反應快嘅小型模型。

雖然蒸餾技術本身唔一定算犯法，但OpenAI指出，佢哋嘅服務條款明確禁止開發者利用其模型輸出內容，用於訓練具競爭性模型。換言之，即使唔涉及版權法，亦可能違反契約法。而根據檢測公司Copyleaks分析，DeepSeek-R1約有74%輸出風格與OpenAI相似，進一步引發仿冒疑雲。

OpenAI聲稱已掌握DeepSeek「不當蒸餾」嘅證據，並已加強內部安全，包括限制開發者存取權限、身份驗證程序、隔離敏感技術模組等，防止企業間技術滲漏。事件震動AI產業鏈，全球多國政府亦開始考慮是否要對中國AI模型實施預防性封鎖。

至於DeepSeek本身就回應指，其R1模型係基於Meta（Facebook母公司）及阿里巴巴等開源架構開發，並非抄襲OpenAI模型。多名法律專家亦認為，即使有使用ChatGPT輸出訓練模型，只要冇明確抄襲OpenAI原創內容，未必構成侵權。但若違反API使用協議，就可能觸犯契約法，仍具法律風險。