7月6日晚，中國河南省省會鄭州市人民公園發生針對性少數群體嘅仇恨暴力事件。影片顯示，一班青年手持棍棒，圍追毆打唔同男子，邊打邊大叫「你是不是1？」、「是不是來找男人？」等侮辱性言語。據了解，施暴者事前會扮同性戀人士，喺同志App上釣魚誘騙受害者去到公園，再集體施暴。

影片見到，施襲嘅流氓團體拎住疑似鋼管、木棍等武器追打唔同嘅男子，被打人士不斷求饒「不要打了，救命」，更有人聲稱「我不是（同志）」，但施暴團體繼續不停逼問受害者：「你是不是？你是不是？你第一次來？」甚至揪住其中一個受害者嘅頭髮，不停用腳踹佢，場面令人睇到心寒。

微博上有博主批評，呢件事已經唔係普通欺凌或聚眾鬥毆，「這是單方面的涉黑涉惡違法犯罪」，更係「有預謀有組織的犯罪」。尤其令人氣憤嘅係，施暴者竟然將襲擊片段上載到網絡，完全無悔意。有網民指，呢班流氓團體全部都係年輕人，手持噴霧、棍棒，期間不停用污言穢語辱罵受害者。

事件發生後，雖然當事人即時報警，亦有網民向鄭州市民熱線查詢，但鄭州警方最初一直冷處理，直至9日晚，疑因輿論壓力，鄭州市公安機關先至表示已經拘捕涉案疑犯17名，其中11人依法刑事拘留，6人行政拘留（當中5人因為未滿16歲而無執行）。警方指，疑犯透過網絡建立聯繫，多次臨時起意，相約犯案，目前案件仍喺調查當中。

不過，有網民發佈事件相關微博之後卻被封鎖。有網民指出，呢班流氓團伙早已有針對gay或普通路人嘅施暴前科，之前多次有人報警，但警方一直無積極回應。不少網民質疑，不論受害人嘅性取向如何，「如此惡劣的治安事件，為何會沒有官方通報?」

一名自稱嚟自河南嘅微博網民留言表示，自己去年曾經考慮過返鄭州發展，但係見到「鄭州人民公園發生多起針對男同性戀者的暴力襲擊」事件之後，佢話：「我覺得如果我去年回家了，視頻裡被打的人有可能就是我。」佢又指出：「影片裡『你是不是喜歡男的』、『你是1還是0』『別低頭打死你』的辱罵是我熟悉的鄉音，是我每次回家坐高鐵，一進車廂聽到時就會覺得好溫暖好親切的家鄉話。」

微博帳號「阿強同志」嘅專欄作者7日發文話，睇過影片之後徹夜難眠，佢表示若經進一步調查證實呢件事係因為性傾向而產生嘅惡意攻擊，「就不只是一起普通的暴力事件，而是一場嚴重的仇恨犯罪。」同志交友平台Blued創始人耿樂亦公開表示，呢件係非常嚴重嘅事件，呼籲嚴懲施暴者，盡快查清事實。

知乎網民指出，針對「男同志」嘅暴力襲擊，喺90年代中國曾經出現過，「當時北京的流氓混混有一個愛好，叫『打兔子』，閒著沒事去筒子河或東單公園找gay，就是一頓毆打，沒有任何法律後果。」

今年4月，內地編劇汪海林亦曾喺微博發文話：「90年代北京爺們有個娛樂活動是『打兔子』，去公園找gay，找到後就一頓爆揍。」今次鄭州人民公園事件後，佢嘅言論再次引起爭議。佢本人就回應指，自己一直以來都反對「打兔子」呢種活動，但網民仍然批評佢嘅言論係變相助長仇恨犯罪。