英國衛報引述加州媒體KGTV報道，加拿大籍女子奧莉薇拉（Cynthia Olivera）喺美國移民局申請綠卡期間，被美國移民及海關執法局（ICE）人員當場拘留，隨後更被安排遣返，事件令呢個曾經支持特朗普嘅家庭感到錯愕同憤怒。

奧莉薇拉嘅丈夫弗朗西斯科（Francisco Olivera）係美國公民，並自稱係特朗普嘅支持者，但妻子被拘捕之後，佢表示感覺自己被「徹底出賣」，甚至公開話：「我想攞返我張選票！」

45歲嘅奧莉薇拉係三名美國出生子女嘅母親，雖然特朗普政府一直聲稱佢哋嘅移民政策係針對嚴重罪犯，但奧莉薇拉明顯唔係呢一類人，事件揭示特朗普政府移民政策執行上嘅強硬無情。

奧莉薇拉10歲嗰年，父母喺冇申請任何許可嘅情況下，帶佢由多倫多去咗美國居住。1999年，19歲嘅佢被美國移民官員發現非法居留，並迅速驅逐出境。不過短短幾個月後，奧莉薇拉就由墨西哥開車去到聖地牙哥，當時嘅邊境檢查人員並冇阻止佢再次入境。

奧莉薇拉強調，自己過去25年喺洛杉磯打工，一直有納稅同供養家庭，從未有任何犯罪記錄。2024年，喺拜登總統任期尾段，她更獲發臨時工作許可證，並一直積極爭取永久居留權（綠卡）。但奧莉薇拉夫婦最終冇支持拜登嘅接班人、前副總統賀錦麗，而係選擇投票支持再次參選嘅特朗普，因為佢哋相信特朗普只會針對嚴重罪犯進行大規模遣返行動，完全冇諗過呢個政策會對自己家庭帶嚟影響。

但事實上，6月13日，奧莉薇拉喺加州查茨沃斯（Chatsworth）進行綠卡面試時，當場被美國移民和海關執法局（ICE）拘捕，隨即被送往德州埃爾帕索嘅拘留中心，等候遣返加拿大。

喺埃爾帕索拘留中心接受視像訪問時，奧莉薇拉激動地表示：「美國係我嘅國家，呢度係我遇到丈夫嘅地方，係我由小學到高中一直成長嘅地方，仲係我養大仔女嘅地方。」佢哽咽地強調，自己唯一嘅錯就係「熱愛美國，努力工作，供養子女」。

但特朗普政府對事件毫不留情，ICE發言人回應稱奧莉薇拉係「來自加拿大嘅非法移民」，佢過去曾經被驅逐出境，卻再次非法入境，而再入境係屬於重罪，因此會繼續被拘留，直至送返加拿大為止。加拿大政府回覆媒體查詢時表示已知悉奧莉薇拉嘅拘留情況，但強調每個國家或地區都有權決定邊境嘅出入政策，無法直接介入事件。

丈夫弗朗西斯科感到極度失望，表示佢哋一家原本都深信特朗普未來四年嘅政策，依家卻要面對骨肉分離嘅痛苦現實。奧莉薇拉則表示，佢同丈夫已經表達願意自行承擔機票費用返加拿大，並計劃暫居喺密西沙加（Mississauga）嘅親戚屋企，但至今仍未獲安排離境日期。事件引發美國社會廣泛關注，支持者發起網上聯署，呼籲當局人道處理。